குடிமகன்களுக்கு ஷாக்கிங் நியூஸ்! நாளை டாஸ்டாக் கடைகளுக்கு மட்டுமல்ல பார்களுக்கும் விடுமுறை!

தமிழக அரசின் மதுவிலக்கு ஆயுத் தீர்வுதுறை அமைச்சகத்தின் கட்டுப்பாட்டின் கீழ் டாஸ்மாக் கடைகள் இயங்கி வருகின்றன. தமிழகம் முழுவதும் 38 மாவட்டங்களில் 4,829 டாஸ்மாக் கடைகள் செயல்பட்டு வருகிறது. நாளுக்கு நாள் மது குடிப்பவர்களின் எண்ணிக்கை அதிகரித்து வருவதால் தினமும் டாஸ்மாக் வருமானம் 100 கோடி ரூபாய் அளவுக்கு விற்பனை நடைபெறுகிறது. அதுவும் பண்டிகை நாட்களான தீபாவளி, பொங்கல், புத்தாண்டு போன்ற நாட்கள் வந்துவிட்டால் தமிழக அரசு கல்லா கட்டும்.

இந்நிலையில் தீபாவளி, பொங்கல் போன்ற பண்டிகை நாட்களில் கூட டாஸ்மாக் கடைகள் இயங்கும். தமிழகத்தில் டாஸ்மாக் கடைகளுக்கு குறிப்பிட்ட 8 நாட்கள் விடுமுறை அளிக்கப்படுகிறது. அதாவது திருவள்ளுவர் தினம், குடியரசு தினம், மகாவீர் ஜெயந்தி, வடலூர் ராமலிங்கர் நினைவு நாள், மே தினம், சுதந்திர தினம், நபிகள் நாயகம் பிறந்த நாள், காந்தி ஜெயந்தி போன்ற நாட்களாகும். அதுமட்டுமல்லாமல் முக்கியமான தலைவர்களின் நினைவு தினம், கோவில் திருவிழா போன்ற தினங்களில் அந்தந்த மாவட்டங்களின் டாஸ்மாக் கடைகளுக்கு விடுமுறை அளிக்கப்படுகிறது.

இந்நிலையில் இமானுவேல் சேகரன் நினைவு தினத்தையொட்டி மதுரை மாவட்டத்தில் நாளை அனைத்து மதுபானக் கடைகள், மதுக்கூடங்கள் செயல்படாது என அறிவிப்பு வெளியாகியுள்ளது. இதுதொடர்பாக மாவட்ட நிர்வாகம் வெளியிட்டுள்ள செய்தி குறிப்பில்: மதுரை மாவட்டத்தில் நாளை அமரர் இமானுவேல் சேகரன் நினைவு தினம் முன்னிட்டு, உரிமம் பெற்றுள்ள அனைத்து தமிழ்நாடு மாநில வாணிபக் கழக மதுபான சில்லரை விற்பனைக் கடைகள், அதனுடன் இணைந்து இயங்கும் மதுக்கூடங்கள் (PL1/FL2/FL3/PL3A மற்றும் PL11) அனைத்தும் நாளை ஒரு நாள் மட்டும் அமரர் இமானுவேல் சேகரன் நினைவு தினத்தன்று மூடப்பட்டு இருக்கும்.

மேற்படி நாளில் மது விற்பனை தொடர்பான விதிமீறல்கள் ஏதும் நடைபெறாமல் கண்காணிக்கவும் அலுவலர்களுக்கு அறிவுறுத்தப்பட்டுள்ளது. மேற்படி தினங்களில் மதுபான சில்லரை விற்பனை எதுவும் நடைபெறாது என தெரிவிக்கப்பட்டுள்ளது.