டி20 உலகக்கோப்பை.. பாகிஸ்தான் வீரர் விசித்திர பவுலிங் தவறானதா? ஐசிசி ரூல்ஸ் சொல்வது என்ன?

டி20 உலகக்கோப்பையில் அமெரிக்காவுக்கு எதிரான போட்டியில் பாகிஸ்தான் வீரர் உஸ்மான் தாரிக்கின் பந்துவீச்சு விநோதமாக இருந்ததை நீங்கள் பார்த்திருக்கலாம். அதாவது குறைந்த ரன்‍அப் செய்து க்ரீஸை அடைந்ததும் ஒரு நொடி நிறுத்தி அவர் பந்துவீசியது வித்தியாசமாக இருந்தது.

ஆனால் இவரது பந்துவீச்சு ஐசிசி விதியை மீறியுள்ளதாக ஆஸ்திரேலிய வீரர் கேமரூன் கிரீன், இங்கிலாந்தின் டாம் பேண்டன் ஆகியோர்  சந்தேகம் தெரிவித்தனர். கிரீன், தாரிக்கின் பந்துவீச்சை கேலி செய்து பின்பற்றினார். இது சட்டவிரோதமானதா?

தனது பந்துவீச்சு குறித்த குற்றச்சாட்டுகளுக்கு தாரிக் பதிலளித்துள்ளார். 'எனக்கு இரட்டை மூட்டு உள்ளது. என் கை இயற்கையாகவே வளைந்தது. இதை சோதனை செய்து அனுமதி பெற்றுள்ளேன்' என அவர் விளக்கியுள்ளார்.

மருத்துவத்தில் 'ஹைப்பர் மொபைல் எல்போ' எனப்படும் இந்த நிலை முத்தையா முரளிதரனுக்கும் இருந்தது. பல சர்ச்சைகளுக்குப் பிறகு அவர் நிரபராதி என நிரூபிக்கப்பட்டார். பும்ராவுக்கும் இதே போன்ற சர்ச்சை எழுந்து அவருக்கும் ஐசிசி கிரீன் சிக்னல் கொடுத்தது.

ஐசிசி விதிகளின்படி, பந்துவீசும்போது முழங்கையை 15 டிகிரிக்கு மேல் வளைக்கக் கூடாது. பாகிஸ்தான் சூப்பர் லீக்கில் தாரிக்கின் பந்துவீச்சு இருமுறை புகாரளிக்கப்பட்டது. ஆனால் சோதனைகளில் அவர் க்ளீன் சிட் பெற்றார்.

டென்னிஸ் பந்து கிரிக்கெட்டில் வேகப்பந்து வீச்சாளராக தாரிக் தொடங்கினார். பயிற்சியாளரின் ஆலோசனையின் பேரில் ஆஃப்-ஸ்பின் முயற்சி செய்து, விக்கெட்டுகளை வீழ்த்தியதால் சுழற்பந்து வீச்சாளராக மாறினார்.

சர்வதேச கிரிக்கெட்டில் 3 மாதங்களில் 11 விக்கெட்டுகளை வீழ்த்திய தாரிக், ரன்களைக் கட்டுப்படுத்துவதிலும் சிறந்தவர். இவரது எகானமி ரேட் 6-க்கும் குறைவாக (5.93) உள்ளது என்பது குறிப்பிடத்தக்கது.