இனி பெங்களூருவில் ஐபிஎல் இல்லை..! ஹோம் கிரவுண்டை மாற்றும் ஆர்சிபி..! எங்க தெரியுமா?

ஐபிஎல் 2025 சீசனில் ராயல் சேலஞ்சர்ஸ் பெங்களூரு அணி பஞ்சாப் கிங்ஸை வீழ்த்தி முதன் முறையாக சாம்பியன் பட்டம் வென்று அசத்தியது. இதன் மூலம் 18 ஆண்டுகால கோப்பை தாகத்தை தணித்தது. ஆனால் ஆர்சிபியின் வெற்றிக் கொண்டாட்டம் பெரும் சோகத்தில் முடிந்தது. சாம்பியன் ஆர்சிபி அணியைக் காண சின்னசாமி ஸ்டேடியம் அருகே ரசிகர்கள் பெருமளவில் திரண்டிருந்தனர். அப்போது ஏற்பட்ட திடீர் நெரிசலில் 11 பேர் உயிரிழந்தனர்.

இதற்குப் பிறகு, கர்நாடக மாநில அரசும், பிசிசிஐ-யும் சின்னசாமி ஸ்டேடியத்தில் பெரிய தொடர்களை நடத்த அனுமதி மறுத்து வருகின்றன. இங்கு நடைபெறவிருந்த ஐசிசி மகளிர் ஒருநாள் உலகக் கோப்பை தொடரும் வேறு இடத்திற்கு மாற்றப்பட்டது.

 சில ஊடக அறிக்கைகளின்படி, இனி சின்னசாமி ஸ்டேடியத்தில் போட்டிகள் நடக்க வாய்ப்பில்லை என்று கூறப்படுகிறது. இதனால், ஆர்சிபி அணி தனது சொந்த மைதானத்தை மாற்றும் முடிவில் இருப்பதாக தெரிகிறது.

ஆர்சிபிக்கு வந்த ஆஃபர்

சின்னசாமி ஸ்டேடியம் சர்ச்சைக்கிடையே, மகாராஷ்டிரா கிரிக்கெட் சங்கம் ராயல் சேலஞ்சர்ஸ் பெங்களூரு அணிக்கு ஒரு ஓபன் ஆஃபர் கொடுத்துள்ளது. டைம்ஸ் ஆஃப் இந்தியா அறிக்கையின்படி, 2026 ஐபிஎல் தொடரில் புனேவில் உள்ள மகாராஷ்டிரா கிரிக்கெட் சங்க மைதானத்தை தங்களது ஹோம் கிரவுண்டாக பயன்படுத்திக்கொள்ள ஆர்சிபி-க்கு அழைப்பு விடுக்கப்பட்டுள்ளது. 

இது தொடர்பாக ஆர்சிபி மற்றும் மகாராஷ்டிரா கிரிக்கெட் சங்கத்திற்கு இடையே பேச்சுவார்த்தை நடந்து வருவதாகவும் கூறப்படுகிறது.

இதை உறுதிப்படுத்தும் வகையில், எம்சிஏ-வின் கமலேஷ் ஃபிசல், ''ஆர்சிபி இங்கு போட்டிகளை நடத்துவது குறித்து பேச்சுவார்த்தை நடந்து வருகிறது. ஆனால், இதுவே ஆர்சிபி-யின் சொந்த மைதானமாக மாறும் என்பது இன்னும் உறுதியாகவில்லை. நாங்கள் எங்கள் மைதானத்தை வழங்கத் தயாராக இருக்கிறோம். பேச்சுவார்த்தை ஆரம்ப கட்டத்தில் உள்ளது. எல்லாம் திட்டமிட்டபடி நடந்தால், புனே இந்த முறை ஆர்சிபி-யின் சொந்த மைதானமாக ஐபிஎல் போட்டிகளை நடத்தும்'' என்று கூறியுள்ளார்.

ராயல் சேலஞ்சர்ஸ் பெங்களூரு அணிக்கும் சின்னசாமி ஸ்டேடியத்திற்கும் ஒரு பிரிக்க முடியாத பந்தம் உள்ளது. இங்குள்ள ரசிகர்களும் ஆர்சிபி அணியை தொடர்ந்து ஆதரித்து வருகின்றனர். ஆனால், பெங்களூருவில் இருந்து ஆர்சிபி போட்டிகள் மாற்றப்பட்டால் அடுத்து என்ன நடக்கும் என்ற கேள்விக்கு தற்போதைக்கு எந்த பதிலும் இல்லை.