T20 World Cup: இந்தியாவுடன் விளையாட மறுக்கும் பாகிஸ்தான்..! ஒட்டுமொத்த PSL தொடருக்கும் ஆப்பு வைக்கும் ICC

சர்வதேச அளவிலான அனைத்து போட்டிகளும் ஐசிசி விதிகளின்படியே நடக்கின்றன. இந்தியாவுக்கு எதிரான போட்டியில் விளையாடாதது குறித்து, பிசிபி தனது முடிவை மறுபரிசீலனை செய்ய வேண்டும் என ஐசிசி கூறியுள்ளது. பிசிபி வலுவான காரணத்தை கூறாவிட்டால், பாகிஸ்தானை இந்த உலகக் கோப்பையில் இருந்து நீக்க ஐசிசிக்கு அதிகாரம் உள்ளது.

இந்தியா-பாகிஸ்தான் போட்டி என்பது ஐசிசி-க்கு மிகப்பெரிய வருவாய் ஆதாரம். டிவி உரிமைகள், விளம்பரங்கள், ஸ்பான்சர்கள் அனைத்தும் இந்த போட்டியை நம்பியுள்ளன. போட்டி நடக்காவிட்டால், ஐசிசி-க்கு நேரடி இழப்பு ஏற்படும். இதனால், எதிர்காலத்தில் பாகிஸ்தானுக்கு ஐசிசி தொடர்களை நடத்தும் வாய்ப்பு கிடைப்பது கடினமாகலாம். ஆண்டு வருவாயிலும் குறைப்பு ஏற்படலாம்.

ஐசிசி விதி 16.10.7-ன்படி, ஒரு அணி விளையாட மறுத்தால், அதன் ஸ்கோர் 20 ஓவர்களில் 0 ரன்களாகக் கருதப்படும். இதனால் பாகிஸ்தானின் ரன் ரேட் கடுமையாக சரியும். மற்ற போட்டிகளில் வென்றாலும், நெகட்டிவ் ரன் ரேட் காரணமாக குரூப் ஸ்டேஜிலேயே வெளியேறும் அபாயம் உள்ளது. இது உலகக் கோப்பை கனவை தகர்க்கும்.

ஒருவேளை பாகிஸ்தான் நாக் அவுட் சுற்றுக்கு முன்னேறி, அங்கு இந்தியாவை எதிர்கொள்ள நேர்ந்தால் என்ன செய்யும்? அப்போதும் விளையாட மறுக்குமா? அல்லது விதிகள் மாறுமா? இந்தக் கேள்விக்கு பிசிபி தெளிவான பதில் அளிக்கவில்லை என்றால், ஐசிசி கடுமையான நடவடிக்கைகளை எடுக்க வாய்ப்புள்ளது.

ஐசிசி அதிருப்தி அடைந்தால், அதன் தாக்கம் பாகிஸ்தான் சூப்பர் லீக் (பிஎஸ்எல்) மீதும் விழலாம். பாதுகாப்பு காரணத்தை ஏற்காத ஐசிசி, பிஎஸ்எல் தொடருக்கு தடையில்லாச் சான்றிதழ் (NOC) வழங்க மறுக்கக்கூடும். பிஎஸ்எல் பாகிஸ்தான் கிரிக்கெட்டின் முக்கிய வருவாய் ஆதாரம் என்பதால் இது பெரும் பாதிப்பை ஏற்படுத்தும்.