ஆசிய கோப்பை! இந்திய ராணுவத்தை அவமதித்த ஹாரிஸ் ராஃப்புக்கு தரமான பதிலடி கொடுத்த பும்ரா!

ஆசிய கோப்பைக்கான பாகிஸ்தானுக்கு எதிரான இறுதிப் போட்டியில், இந்திய வேகப்பந்து வீச்சாளர் ஜஸ்பிரித் பும்ரா, பாகிஸ்தான் வீரர் ஹாரிஸ் ராஃபை ஆட்டமிழக்கச் செய்த பிறகு "விமான விபத்து" கொண்டாட்டத்தில் ஈடுபட்டார். சூப்பர் ஃபோர் சுற்றில் ராஃப் தனது ஆத்திரமூட்டும் சைகைகளுக்காக விமர்சிக்கப்பட்டிருந்தார். இந்த போட்டியில் பும்ராவின் முதல் விக்கெட்டாகவும், ஒட்டுமொத்தமாக ஒன்பதாவது விக்கெட்டாகவும் ராஃப் ஆட்டமிழந்தார்.

அவரது ஸ்டம்பை தகர்த்த பிறகு, பும்ரா தனது கையால் விமானம் நொறுங்குவது போல் சைகை செய்தார். இது சில நாட்களுக்கு முன்பு சூப்பர் ஃபோர் மோதலில் ராஃப் செய்த செயலுக்கு நேரடி பதிலடியாக அமைந்தது. ஒரு வாரத்திற்கு முன்பு சூப்பர் ஃபோர் மோதலின் போது ராஃப் ஃபீல்டிங் செய்து கொண்டிருந்தபோது, இந்தியப் பார்வையாளர்களின் கிண்டல்களுக்கு பதிலளிக்கும் விதமாக, "0-6" என்று தனது விரல்களை உயர்த்தி காட்டினார்.

இது இந்த ஆண்டு மே மாதம் இந்தியாவின் சிந்தூர் நடவடிக்கைக்குப் பிறகு, எல்லையில் நடந்த நான்கு நாள் மோதலின் போது ஆறு இந்தியப் போர் விமானங்களைச் சுட்டு வீழ்த்தியதாக பாகிஸ்தான் கூறிய ஆதாரமற்ற கூற்றுகளைக் குறிப்பதாகும். ராஃபின் இந்த செயல் சமூக ஊடகங்களில் காட்டுத்தீ போல பரவியது. அவரது சைகையின் வீடியோக்கள் வைரலாகின. பல இந்திய ரசிகர்களிடமிருந்து கடும் கண்டனங்களைப் பெற்றார்.

2022 டி20 உலகக் கோப்பையின் போது மெல்போர்னில் 160 ரன்கள் சேஸிங்கில், விராட் கோலி அவரை அடுத்தடுத்து இரண்டு சிக்ஸர்கள் அடித்ததால், ரசிகர்கள் "விராட் கோலி" என்று கோஷமிட்டு ராஃபை கிண்டல் செய்தனர். அதில் ஒரு ஷாட்டை சர்வதேச கிரிக்கெட் கவுன்சில் (ஐசிசி) 'நூற்றாண்டின் சிறந்த ஷாட்' என்று வர்ணித்துள்ளது.

இர்பான் பதான் கொண்டாட்டம்

இந்திய அணியின் அதிகாரப்பூர்வ ஆதரவாளர்கள் குழுவான 'பாரத் ஆர்மி' பும்ராவின் கொண்டாட்டத்தை தங்களது எக்ஸ் பக்கத்தில், "விக்கெட் வீழ்ந்தது", என்று ஒரு எமோஜியுடன் பதிவிட்டுள்ளது. பாகிஸ்தான் வீரர்களுடனான வாக்குவாதங்களுக்குப் பெயர் பெற்ற முன்னாள் இந்திய கிரிக்கெட் வீரர் இர்பான் பதானும், தனது எக்ஸ் பக்கத்தில், "ஃப்ளைட் லேண்ட் கரா தி பும்ரா நே (பும்ரா விமானத்தை தரையிறக்கிவிட்டார்)" என்று பதிவிட்டுள்ளார்.