ராஜஸ்தான் பார்மர் மாவட்டத்தில், காதல் திருமணத்தால் ஏற்பட்ட குடும்பப் பகையில் கொடூர வன்முறை நிகழ்ந்துள்ளது. பெண்ணின் உறவினர்கள் மணமகன் சகோதரரின் மூக்கை அறுத்த நிலையில், பதிலுக்கு மணமகன் தரப்பினர் தாக்கியதில் பெண்ணின் மாமாவின் கால் முறிந்தது.
ராஜஸ்தான் மாநிலம் பார்மர் மாவட்டத்தில், ஒரு காதல் திருமணம் தொடர்பாக இரு குடும்பங்களுக்கு இடையே ஏற்பட்ட மோதல் வன்முறையாக மாறியது. இதில் இருவர் படுகாயமடைந்து உயிருக்கு ஆபத்தான நிலையில் சிகிச்சை பெற்று வருகின்றனர்.
அதே கிராமத்தைச் சேர்ந்த 25 வயதுடைய சிரவண் சிங் என்பவர், ஒரு பெண்ணைக் காதலித்து திருமணம் செய்து கொண்டார். இந்தப் திருமணத்தை அந்தப் பெண்ணின் குடும்பத்தினர் ஏற்றுக்கொள்ளவில்லை. இதனால் இரு குடும்பங்களுக்கும் இடையே நீண்ட நாட்களாகப் பகை இருந்து வந்தது. தற்போது சிரவண் சிங் தனது மனைவியுடன் குஜராத்தில் குடியேறிவிட்டார்.
நடந்தது என்ன?
புதன்கிழமை மாலை, சிரவண் சிங்கின் அண்ணன் யுகே சிங் (35) வயலில் இருந்து வீடு திரும்பிக் கொண்டிருந்தார். அப்போது பெண்ணின் மாமனான தரம் சிங் (50) மற்றும் அவரது கூட்டாளிகள் யுகே சிங்கை வழிமறித்துத் தாக்கினர்.
Related Articles
கூர்மையான ஆயுதத்தால் யுகே சிங்கின் மூக்கை அவர்கள் அறுத்தனர். ரத்த வெள்ளத்தில் தப்பிய அவர் எப்படியோ தனது வீட்டிற்குச் சென்றார்.
இதைக் கண்டு ஆத்திரமடைந்த யுகே சிங்கின் உறவினர்கள், பெண்ணின் வீட்டின் மீது தாக்குதல் நடத்தினர். இதில் தரம் சிங்கின் கால் அடித்து உடைக்கப்பட்டது.
படுகாயமடைந்த இருவரும் உடனடியாக கூடாமலானி மருத்துவமனையில் அனுமதிக்கப்பட்டனர். யுகே சிங் மேலதிக சிகிச்சைக்காக சாஞ்சோருக்கும், நிலைமை கவலைக்கிடமாக இருந்த தரம் சிங் ஜோத்பூருக்கும் மாற்றப்பட்டனர்.
சம்பவ இடத்திற்கு விரைந்த கூடாமலானி போலீசார் வழக்குப்பதிவு செய்துள்ளனர். தலைமறைவாக உள்ள குற்றவாளிகளைப் பிடிக்க தனிப்படைகள் அமைக்கப்பட்டுள்ளன.
தொடரும் வன்முறைகள்:
கடந்த மாதம் மகாராஷ்டிராவில் திருமண மேடையிலேயே மணமகன் குத்தப்பட்ட சம்பவம் நிகழ்ந்த நிலையில், தற்போது ராஜஸ்தானில் இந்த கொடூர சம்பவம் அரங்கேறியுள்ளது குறிப்பிடத்தக்கது.
