இந்தியாவுக்கு அலர்ட் கொடுத்த டிரம்ப்! ரகசிய அணு ஆயுத சோதனை செய்யும் சீனா, பாகிஸ்தான்!

ரஷ்யா, வட கொரியா மற்றும் பாகிஸ்தான் ஆகிய நாடுகளுடன் சேர்ந்து சீனாவும் இரகசிய அணு ஆயுதப் பரிசோதனைகளை மேற்கொண்டு வருவதாக அமெரிக்க அதிபர் டொனால்டு டிரம்ப் கூறியுள்ளார். ஆனால், இந்தக் குற்றச்சாட்டை சீனா முற்றிலும் மறுத்துள்ளது.

கடந்த ஞாயிற்றுக்கிழமை, சிபிஎஸ்ஸின் '60 மினிட்ஸ்' (60 Minutes) நிகழ்ச்சியில் பேசிய டிரம்ப், ரஷ்யா மற்றும் சீனா உள்ளிட்ட நாடுகள் ரகசியமாக நிலத்தடி அணு ஆயுதப் பரிசோதனைகளை மேற்கொள்வதாகவும், அமெரிக்காவும் அதைப் பின்பற்றும் என்றும் கூறினார்.

"ரஷ்யா பரிசோதனை செய்கிறது, சீனாவும் பரிசோதனை செய்கிறது, ஆனால் அவர்கள் அதைப் பற்றிப் பேசுவதில்லை. பரிசோதனை செய்யாத ஒரே நாடாக அமெரிக்கா இருப்பதை நான் விரும்பவில்லை," என்று கூறிய டிரம்ப், இந்தப் பட்டியலில் வட கொரியா மற்றும் பாகிஸ்தானும் இருப்பதாகக் குறிப்பிட்டார்.

அணுகுண்டு வெடிப்பு இல்லாமல் செய்யப்படும் 'அணுசக்தி அல்லாத' (non-critical explosions) அமைப்புகள் தொடர்பான பரிசோதனைகளையே அமெரிக்கா திட்டமிட்டுள்ளதாக அமெரிக்க அதிகாரிகள் விளக்கியுள்ளனர். எனினும், ட்ரம்ப் தான் முழுமையான அணு குண்டு வெடிப்பு பரிசோதனைக்கு உத்தரவிட்டது போல பேசினார்.

வட கொரியாவைத் தவிர வேறு எந்த நாடும் பல ஆண்டுகளாக அணு குண்டு வெடிப்புப் பரிசோதனையை நடத்தவில்லை என்பது குறிப்பிடத்தக்கது. ரஷ்யா கடைசியாக 1990இலும், சீனா 1996இலும் அணு குண்டு வெடிப்புப் பரிசோதனைகளை மேற்கொண்டன. 1996ஆம் ஆண்டு முதல் விரிவான அணு ஆயுதப் பரிசோதனைத் தடை ஒப்பந்தத்தில் (CTBT) அமெரிக்கா கையெழுத்திட்டுள்ளது, இது அனைத்து அணு குண்டு வெடிப்புப் பரிசோதனைகளையும் தடை செய்கிறது.

டிரம்பின் குற்றச்சாட்டுக்கு சீனா திட்டவட்டமாக மறுப்பு தெரிவித்துள்ளது. பெய்ஜிங்கில் நடந்த ஒரு பத்திரிகையாளர் சந்திப்பில் சீன வெளியுறவு அமைச்சகத்தின் செய்தித் தொடர்பாளர் மௌ நிங் பேசுகையில், “சீனா ஒரு 'பொறுப்பான அணு ஆயுத நாடு' என்ற முறையில், எப்போதும் அமைதியான வளர்ச்சியின் பாதையையே கடைப்பிடித்து வருகிறது.” என்றார்.

அணு ஆயுதங்களை முதலில் கையில் எடுக்கும் நாடாக இருக்கக் கூடாது என்ற கொள்கையை சீனா தொடர்ந்து பின்பற்றி வருகிறது என்றும் மௌ நிங் வலியுறுத்தினார்.

சர்வதேச அணு ஆயுதக் குறைப்பு மற்றும் அணுஆயுத பரவல் தடுப்பு அமைப்பைப் பாதுகாக்க அமெரிக்கா உறுதியான நடவடிக்கைகளை எடுக்கும் என்று சீனா நம்புகிறது என்றும் அவர் தெரிவித்துள்ளார்.

பாகிஸ்தானும் சீனாவும் அணு ஆயுதங்களை சோதனை செய்கின்றன என்ற கூற்று உண்மையாக இருந்தால், அது இந்தியாவுக்கு அச்சுறுத்தலை அதிகரிக்கும். பாதுகாப்பு மற்றும் இராஜதந்திர நடவடிக்கைகளில் மறுபரிசீலனை செய்ய வேண்டியிருக்கும். அதே நேரத்தில், அணு ஆயுத சோதனைகளை மீண்டும் தொடங்குவது அல்லது அதிகரிப்பது உலகளாவிய நிலைத்தன்மைக்கு கடுமையான சவாலாக இருக்கும். பிராந்திய ஸ்திரத்தன்மையை சமநிலைப்படுத்துவதில் இந்தியா கவனமாக இருக்க வேண்டும்.

பாகிஸ்தானும் சீனாவும் அணு ஆயுதங்களை சோதனை செய்கின்றன என்ற டிரம்பின் கருத்து தெற்காசியாவிற்கான எச்சரிகையாக உள்ளது. இரண்டு அண்டை நாடுகள் அணு ஆயுத சோதனைகளில் ஈடுபடுவது குறித்து இந்தியா மெத்தனமாக இருக்க முடியாது. ரகசிய சோதனைகள் நடந்துகொண்டிருக்கும் நிலையில், விழிப்புணர்வு, தயார்நிலையை உறுதிசெய்ய வேண்டும்.