சென்னை மக்களுக்கு குட் நியூஸ்.. புதிய எக்ஸ்பிரஸ்வே.. 120 கி.மீ வேகம்… 6 வழிச்சாலை

சென்னை–சூரத் தேசிய விரைவுச்சாலை திட்டத்தில் முக்கிய மாற்றம் அறிவிக்கப்பட்டுள்ளது. பாரத்மாலா பரியோஜனா திட்டத்தின் கீழ் உருவாக்கப்பட இருந்த 6 வழிச்சாலையான இந்த விரைவுச்சாலை, இனி சூரத் வரை செல்லாது. மத்திய சாலை போக்குவரத்து மற்றும் நெடுஞ்சாலை அமைச்சகம் எடுத்த புதிய முடிவின் படி, இந்த நெடுஞ்சாலை சென்னை முதல் நாசிக் வரை மட்டுமே அமைக்கப்படும். இதனால், திட்டத்தின் மொத்த நீளம் 1,271 கி.மீ-யிலிருந்து சுமார் 900 கி.மீ-ஆக குறைக்கப்பட்டுள்ளது.

இந்த மாற்றத்திற்கு முக்கிய காரணமாக, சூரத்–நாசிக் இடையே நிலம் கையகப்படுத்தலில் ஏற்பட்ட கடுமையான சிக்கல்கள் மற்றும் சுற்றுச்சூழல் அனுமதிகளில் ஏற்பட்ட நீண்ட தாமதங்கள் குறிப்பிடப்படுகின்றன. இச்சிக்கல் காரணமாக திட்டத்தின் காலக்கெடு தொடர்ந்து நீண்டுவந்ததால், திட்டத்தை நடைமுறைப்படுத்த எளிதான மாற்று வழியை அரசு தேர்வு செய்ததாக அதிகாரிகள் தெரிவித்தனர். முன்னதாக, இந்த திட்டத்தின் மொத்த செலவு ரூ.50,000 கோடி என மதிப்பிடப்பட்டது.

முதலில் திட்டமிடப்பட்ட பாதையில், சூரத், நாசிக், அகமதுநகர், சோலாப்பூர், கலபுரகி, கர்னூல், கடப்பா, திருப்பதி போன்ற நகரங்கள் இடம்பெற்றிருந்தன. இதன் மூலம் குஜராத், மகாராஷ்டிரா, தெலங்கானா மற்றும் தமிழ்நாடு ஆகிய மாநிலங்கள் நேரடியாக இணைக்கப்பட்டன. புதிய திட்டத்தின் கீழ், மகாராஷ்டிராவில் சம்ருத்தி எக்ஸ்பிரஸ்வேயில் உள்ள பார்வீர் குர்த் முதல் NH-48 (மும்பை–அகமதாபாத் சாலை)யில் உள்ள தவா கிராமம் வரை ஒரு புதிய கிரீன்ஃபீல்ட் விரைவுச்சாலை அமைக்கப்படும். இதை மாநில MSRDC (மகாராஷ்டிரா சாலை மேம்பாட்டு கழகம்) நிர்மாணிக்க உள்ளது.

பாதை குறைக்கப்பட்டாலும், திட்டத்தின் முக்கிய இலக்கு மாறவில்லை என அரசு வட்டாரங்கள் தெரிவித்துள்ளன. இந்த சாலை தொடர்ந்து 6 வழிச்சாலையாகவும், முழுமையாக அணுகல் கட்டுப்பாடு கொண்டதாகவும் இருக்கும். இதில் வாகனங்கள் மணிக்கு 120 கி.மீ வேகத்தில் பயணிக்க முடியும். இதன் மூலம், மத்திய மற்றும் தென் இந்தியாவுக்கு இடையே நீண்ட தூரப் பயணம் வேகமாகவும் எளிதாகவும் மாறும் என எதிர்பார்க்கப்படுகிறது.