பெயர் சர்ச்சையால் வாரணாசி படத்தின் டைட்டில் மாற்றம்: இதுதான் புதிய டைட்டில்!

தெலுங்கு சினிமாவில் முன்னணி நடிகர்களில் ஒருவரான மகேஷ் பாபு நடிப்பில் உருவாகி வரும் புதிய படம் தான் வாரணாசி. இந்தப் படத்தை ஹிட் இயக்குநரான எஸ் எஸ் ராஜமௌலி இயக்குகிறார். மேலும், இந்தப் படத்தில் பாலிவுட் நடிகை பிரியங்கா சோப்ரா, பிரித்விராஜ் சுகுமாரன், ருத்ரா ஆகியோர் பலர் நடிக்கின்றனர். கீரவாணி இந்தப் படத்திற்கு இசையமைக்கிறார். முழுக்க முழுக்க காவிய சாகச திரைப்படமான இந்தப் படம் வரும் 2027 ஆம் ஆண்டு திரைக்கு வர இருக்கிறது.

கிட்டத்தட்ட ரூ.1300 கோடி பட்ஜெட்டில் உருவாகி வரும் இந்தப் படத்தின் டைட்டில் லுக் போஸ்டர் கடந்த சில மாதங்களுக்கு முன்பு வெளியாகி ரசிகர்களிடையே நல்ல வரவேற்பு பெற்றது. இந்த நிலையில் தான் இந்தப் படத்தின் டைட்டில் சர்ச்சை எழுந்ததைத் தொடர்ந்து படத்தின் தலைப்பு மாற்றப்பட்டுள்ளது.

ஆப்பிரிக்க காடுகளில் கதை நடக்கிறது. இது ஒரு டைம் டிராவல் கதை. ராமாயணத்தின் லங்கா தகனம் முக்கிய அம்சம். இதில் மகேஷ் பாபு ராமனாக தோன்றுவார் என ராஜமௌலி கூறியுள்ளார். படம் ஹாலிவுட் தரத்தில் விஷுவல் விருந்தாக இருக்கும். `வாரணாசி` தலைப்பை ராமபக்த ஹனுமா நிறுவனம் முன்பே பதிவு செய்ததால் சர்ச்சை எழுந்தது. ராஜமௌலியும் இதே பெயரை அறிவித்ததால், தயாரிப்பாளர்கள் புகார் அளித்தனர்.

இதன் காரணமாக இயக்குநர் ராஜமௌலி படத்தின் தலைப்பை மாற்றியுள்ளார். மகேஷ் பாபுவின் `வாரணாசி` படத்தின் பெயர் `ராஜமௌலி வாரணாசி` என மாற்றப்பட உள்ளது. தெலுங்கில் இந்தப் பெயரில் வெளியாகும். இப்படம் இரண்டு பாகங்களாக உருவாக இருப்பதாக சொல்லப்பட்ட நிலையில், இப்போது ஒரே பாகமாக உருவாக இருக்கிறதாம். இந்தப் படத்தில் மகேஷ் பாபு 2 கதாபாத்திரங்களில் நடிக்கிறாராம்.