பாடல் காப்புரிமை விவகாரத்தில் கறார் காட்டும் இளையராஜா... அஜித் படத்தின் மீது வழக்கு தொடர்ந்த இசைஞானி..!

அஜித் குமார் நடித்த குட் பேட் அக்லி படத்திற்கு எதிராக இளையராஜா வழக்கு தொடர்ந்துள்ளார். தனது பாடல்களை அனுமதியின்றி படத்தில் பயன்படுத்தியதாகவும், இது பதிப்புரிமைச் சட்ட மீறல் என்றும் அவர் மனுவில் தெரிவித்துள்ளார். 5 கோடி ரூபாய் இழப்பீடு வழங்க வேண்டும் என்றும் கோரிக்கை விடுத்துள்ளார். வழக்கை திங்கட்கிழமை விசாரணைக்கு எடுத்துக்கொள்வதாக நீதிமன்றம் தெரிவித்துள்ளது. அதேசமயம், உண்மையான பதிப்புரிமைதாரர்களிடமிருந்து அனுமதி பெறப்பட்டுள்ளதாக படத்தயாரிப்பாளர்கள் தெரிவித்துள்ளனர்.

ஏப்ரல் 10 ஆம் தேதி குட் பேட் அக்லி திரையரங்குகளில் வெளியானது. ஏப்ரல் 15 ஆம் தேதி இளையராஜா வக்கீல் நோட்டீஸ் அனுப்பியிருந்தார். படத்தில் அனுமதியின்றி தனது மூன்று பாடல்கள் பயன்படுத்தப்பட்டதாக புகார் தெரிவித்திருந்தார். 5 கோடி ரூபாய் இழப்பீடாக வழங்க வேண்டும் என்றும், 7 நாட்களுக்குள் பாடல்களை படத்திலிருந்து நீக்க வேண்டும் என்றும் நோட்டீஸில் கோரியிருந்தார். பணம் வழங்கவில்லை என்றால் சட்ட நடவடிக்கை எடுக்கப்படும் என்றும் இளையராஜா எச்சரிக்கை விடுத்திருந்தார். இதற்கு முன்பும் தனது பாடல்களை அனுமதியின்றி பயன்படுத்தியதாகக் கூறி பல திரைப்படத் தயாரிப்பாளர்களுக்கு இளையராஜா நோட்டீஸ் அனுப்பியுள்ளார்.

ஆதிக் ரவிச்சந்திரன் இயக்கிய படம் குட் பேட் அக்லி. வெளியான ஐந்து நாட்களில் 100 கோடி ரூபாய் வசூலித்தது. அதிரடி ஆக்‌ஷன் படமாக உருவான குட் பேட் அக்லியில் சுனில், ஷைன் டாம் சாக்கோ, பிரசன்னா, ஜாக்கி ஷெராஃப், பிரபு, யோகி பாபு, த்ரிஷா, பிரியா வாரியர், சிம்ரன் உள்ளிட்ட பெரிய நட்சத்திரப் பட்டாளமே நடித்துள்ளது. புஷ்பா தயாரிப்பாளர்களான மைத்ரி மூவி மேக்கர்ஸ் மற்றும் டி சீரிஸ் ஆகியோர் இப்படத்தைத் தயாரித்துள்ளனர். ஜி.வி. பிரகாஷ் குமார் இசையமைத்துள்ளார். இப்படம் உலகளவில் ரூ.243 கோடி வசூலை வாரிக் குவித்து இருந்தது.

குட் பேட் அக்லி திரைப்படத்தில் ஏராளமான பழைய பாடல்கள் பயன்படுத்தப்பட்டு இருந்தன. குறிப்பாக இளையராஜா இசையமைத்த ஒத்த ரூபா தாரேன் பாடல், ஏன் ஜோடி மஞ்சக்குருவி, இளமை இதோ இதோ பாடல் ஆகியவை பயன்படுத்தப்பட்டு இருந்தன. இந்தப் பாடல்களுக்கு தன்னிடம் அனுமதி கோரவில்லை என்பதால் தான் இளையராஜா நீதிமன்றத்தில் வழக்கு தொடர்ந்துள்ளார். இந்த வழக்கு வருகிற செப்டம்பர் 8-ந் தேதி விசாரணைக்கு வர இருக்கிறது.