தங்கத்தின் மீது இவ்வளவு வரிகளா? நகை வாங்குவதற்கு முன் இதை அவசியம் தெரிஞ்சிக்கோங்க!

இந்தியாவில் தங்கத்தின் விலை நாளுக்கு நாள் ராக்கெட் வேகத்தில் உயர்ந்து வருகிறது. சென்னையில் இன்று (பிப்ரவரி 16) ஒரு கிராம் தங்கத்தின் விலை ரூ.14,440 ஆக உள்ளது. ஒரு பவுன் தங்கத்தின் விலை ரூ.15,520 ஆக உள்ளது. ஒரு கிராம் தங்கம் வாங்கினாலே அவர்கள் கோடீஸ்வரர்கள் தான் என்ற நிலையில் தான் தங்கத்தின் விலை உச்சத்தில் உள்ளது.

தங்கத்தின் மீதான வரி

ஆகையால் தங்கம் ஒரு ஆபரணம் மட்டுமல்ல, ஒரு பெரிய முதலீடாகவும் மாறி விட்டது. தங்கம் வாங்கும்போதும் விற்கும்போதும் நாம் வரிகள் செலுத்த வேண்டும் என்பது உங்களுக்கு தெரியுமா? நகை, டிஜிட்டல் தங்கம், பத்திரங்களுக்கான வரி விதிகள் குறித்து விரிவாக பார்க்கலாம்.

 தங்க நகைகள் மற்றும் டிஜிட்டல் தங்கம் வாங்கினால் 3% ஜிஎஸ்டி செலுத்த வேண்டும். மேலும், செய்கூலி மீது 5% ஜிஎஸ்டி தனியாக விதிக்கப்படும். கோல்டு இடிஎஃப், மியூச்சுவல் ஃபண்ட், எஸ்ஜிபி வாங்கினால் ஜிஎஸ்டி இல்லை.

வெளிநாட்டில் இருந்து தங்கம் இறக்குமதி செய்தால் 6% சுங்க வரி செலுத்த வேண்டும். நெருங்கிய உறவினர்கள் தரும் தங்கப் பரிசுக்கு வரி இல்லை. மற்றவர்களிடமிருந்து ₹50,000க்கு மேல் பெற்றால், வருமான வரி உண்டு. 

24 மாதங்களுக்கு மேல் வைத்திருந்து தங்கத்தை விற்றால், லாபத்தில் 12.5% வரி செலுத்த வேண்டும். 24 மாதங்களுக்குள் விற்றால், உங்கள் வருமான வரி வரம்பின்படி வரி விதிக்கப்படும். முழு பணத்தையும் வீடு வாங்கப் பயன்படுத்தினால் வரி விலக்கு உண்டு.

கோல்டு இடிஎஃப் 12 மாதங்களுக்கு மேல் வைத்திருந்தால் 12.5% வரி உண்டு. 12 மாதங்களுக்குள் விற்றால் உங்கள் வரி வரம்பின்படி வரி. கோல்டு மியூச்சுவல் ஃபண்ட்: 24 மாதங்களுக்கு மேல் வைத்திருந்தால் 12.5% வரி விதிக்கப்படும். சாவரின் கோல்டு பாண்ட் (SGB): முதிர்வு வரை வைத்திருந்தால் மட்டுமே வரி விலக்கு. இரண்டாம் நிலை சந்தையில் வாங்கியதற்கோ, முதிர்வுக்கு முன் விற்றாலோ வரி உண்டு. பரம்பரை தங்கத்தை விற்றால் 12.5% வரி செலுத்த வேண்டும் என்பது குறிப்பிடத்தக்கது.