மைலேஜும் அதிகம்.. மாஸும் அதிகம்.. இந்தியாவை கலக்கும் டாப் 5 டீசல் SUV-க்கள்.. முழு லிஸ்ட் இதோ!

இந்தியாவில் புகை விதிகள் கடுமையாக இருந்தாலும், டீசல் கார்களுக்கான மவுசு இன்னும் குறையவே இல்லை. நீங்கள் ஒரு டீசல் கார் பிரியராக இருந்து, பட்ஜெட் விலையில் ஒரு புதிய கார் வாங்க யோசித்துக்கொண்டிருந்தால் ஏராளமான மாடல்கள் உள்ளன. இந்தியாவின் டாப் 5 டீசல் கார்கள் குறித்து இந்த செய்தியில் பார்க்கலாம்.

டாடா நெக்ஸான் காரில் 1.5 லிட்டர் டீசல் இன்ஜின் உள்ளது. இந்த 1.5 லிட்டர், நான்கு சிலிண்டர் இன்ஜின் 115 குதிரைத்திறன் சக்தியையும் 260 Nm டார்க்கையும் உருவாக்குகிறது. இதில் 6-ஸ்பீடு மேனுவல் மற்றும் 6-ஸ்பீடு ஆட்டோமேட்டிக் (AMT) டிரான்ஸ்மிஷன் ஆப்ஷன்கள் கிடைக்கின்றன. டாடா நெக்ஸான் காரின் விலை ரூ.9 லட்சத்தில் இருந்து ரூ.14.22 லட்சம் வரை உள்ளது.

டாடா கர்வ் மாடலில் 1.5 லிட்டர் டீசல் இன்ஜின் பொருத்தப்பட்டுள்ளது. இது 118 குதிரைத்திறன் சக்தியையும் 260 Nm டார்க்கையும் வெளிப்படுத்தும். இந்த இன்ஜினுடன் 6-ஸ்பீடு மேனுவல் மற்றும் 7-ஸ்பீடு DCT ஆட்டோமேட்டிக் டிரான்ஸ்மிஷன் ஆப்ஷன்கள் வருகின்றன. இந்த காரின் சிறப்பம்சமே, அதன் கூபே-எஸ்யூவி பாடி ஸ்டைலும், டீசல் இன்ஜினுடன் வரும் வேகமான டூயல்-கிளட்ச் டிரான்ஸ்மிஷனும் (DCT) தான். இதன் விலை ரூ.11.2 லட்சத்தில் இருந்து ரூ.19.1 லட்சம் வரை இருக்கிறது.

மஹிந்திரா XUV 3XO காரில் 1.5 லிட்டர் டீசல் இன்ஜின் உள்ளது. இது 117 குதிரைத்திறன் சக்தியையும் 300 Nm டார்க்கையும் கொடுக்கிறது. இதிலும் 6-ஸ்பீடு மேனுவல் மற்றும் ஆட்டோமேட்டிக் (AMT) டிரான்ஸ்மிஷன் ஆப்ஷன்கள் உள்ளன. இந்த டீசல் இன்ஜின், அதன் சிறந்த செயல்திறன், குறைந்த வேகத்தில் டர்போ லேக் இல்லாத அனுபவம், மற்றும் சீரான பவர் டெலிவரி போன்ற காரணங்களுக்காக மிகவும் பிரபலம். இதன் விலை ரூ.8.95 லட்சத்தில் இருந்து ரூ.13.43 லட்சம் வரை உள்ளது.

ஹூண்டாய் நிறுவனத்தின் எஸ்யூவி வரிசையில், எக்ஸென்ட் மற்றும் கிரெட்டா கார்களுக்கு இடையில் வென்யூ நிலைநிறுத்தப்பட்டுள்ளது. இதன் டீசல் வேரியன்ட்களில் 1.5 லிட்டர், நான்கு சிலிண்டர் இன்ஜின் உள்ளது. இது 116 குதிரைத்திறன் சக்தியையும் 250 Nm டார்க்கையும் உற்பத்தி செய்கிறது. இந்த இன்ஜினுடன் 6-ஸ்பீடு மேனுவல் கியர்பாக்ஸ் இணைக்கப்பட்டுள்ளது. இரண்டாம் தலைமுறை வென்யூவில் முதல்முறையாக ஆட்டோமேட்டிக் கியர்பாக்ஸ் ஆப்ஷனும் வழங்கப்பட்டுள்ளது. இதன் விலை ரூ.9.88 லட்சத்தில் இருந்து ரூ.15.64 லட்சம் வரை உள்ளது.

காம்பேக்ட் எஸ்யூவி பிரிவில் கியா சிரோஸ் பிரீமியம் அம்சங்களை வழங்குகிறது. இதில் 1.5 லிட்டர், 4-சிலிண்டர் டீசல் இன்ஜின் உள்ளது. இது 116 குதிரைத்திறன் சக்தியையும் 250 Nm டார்க்கையும் வெளிப்படுத்துகிறது. இந்த இன்ஜின் ஆப்ஷனில் 6-ஸ்பீடு மேனுவல் மற்றும் 6-ஸ்பீடு ஆட்டோமேட்டிக் டிரான்ஸ்மிஷன் கிடைக்கிறது. இதே இன்ஜின்தான் கியா சோனெட் மற்றும் ஹூண்டாய் வென்யூவிலும் உள்ளது. நல்ல இடவசதி மற்றும் வென்டிலேஷன் (குஷன் மட்டும்) கொண்ட பின் இருக்கைகள்தான் சிரோஸின் சிறப்பம்சம். இதன் விலை ரூ.10 லட்சத்தில் இருந்து ரூ.15.8 லட்சம் வரை உள்ளது.