ராயல் என்பீல்ட் பைக்குகளின் விலை குறைஞ்சுடுச்சு.. ஒருபக்கம் விலை ஏறிடுச்சு.. முழு லிஸ்ட் இதோ

இந்தியாவில் பைக் ரசிகர்களுக்கு மிகவும் பிரபலமான நிறுவனமாக இருக்கும் ராயல் என்பீல்டின் சில மாடல்களின் விலைகள் தற்போது மாறியுள்ளன. புதிய ஜிஎஸ்டி 2.0 விதிமுறைகள் காரணமாக, சில பைக்குகள் விலை குறைந்துள்ளன. அதே நேரத்தில் சில உயர்தர பைக்குகளின் விலை அதிகரித்துள்ளது. இதனால், பைக் வாங்க திட்டமிடுபவர்கள் முன்பைவிட சற்று அதிக கவனத்துடன் முடிவு எடுக்க வேண்டிய சூழ்நிலை உருவாகியுள்ளது.

350cc-க்கு கீழ் உள்ள ராயல் என்ஃபீல்டு பைக்குகளுக்கு இது ஒரு நல்ல செய்தி ஆகும். Hunter 350, Classic 350, Meteor 350, Bullet 350, Goan Classic 350 போன்ற மாடல்களுக்கு விதிக்கப்பட்ட ஜிஎஸ்டி விகிதம் 28% இலிருந்து 18% ஆகக் குறைக்கப்பட்டுள்ளது. இதன் விளைவாக, இந்த பைக்குகளின் ஆரம்ப விலையில் ரூ.15,000 முதல் ரூ.23,500 வரை குறைவு ஏற்படும் என எதிர்பார்க்கப்படுகிறது. தினசரி பயணம் மற்றும் நீண்ட சவாரி விரும்பும் பொது பயனர்கள் இது பெரிய நிம்மதியாக பார்க்கப்படுகிறது.

ராயல் என்பீல்ட் நிறுவனத்தின் மொத்த விற்பனையில் சுமார் 87% பங்கு 350cc பைக்குகளுக்கே சேர்ந்தவை. அதனால் இந்த வரி குறைப்பு, முதல் முறையாக பைக் வாங்க நினைப்பவர்கள் மற்றும் மிடில்-கிளாஸ் குடும்பங்களை சேர்ந்தவர்களை அதிகமாக ஈர்க்கும். குறைந்த விலை, நம்பகமான இன்ஜின், கிளாசிக் லுக் ஆகியவை இந்த பைக்குகளை மேலும் பிரபலமாக்கும் வாய்ப்பு உள்ளது.

அதே நேரத்தில், 400cc-க்கு மேற்பட்ட பைக்குகளை விரும்பும் பயனர்களுக்கு இது அதிர்ச்சி அளிக்கும் செய்தியாகும். ஹிமாலயன் 450, கெரில்லா 450, ஸ்க்ராம் 440 மற்றும் 650சிசி வரிசை பைக்குகளுக்கு ஜிஎஸ்டி 28% இலிருந்து 40% ஆக உயர்த்தப்பட்டுள்ளது. இதனால் Scram 440க்கு சுமார் ரூ.18,700 வரை, சில 650cc பைக்குகளுக்கு ரூ.33,000க்கும் மேல் விலை உயர்வு காணப்படுகிறது.

மொத்தத்தில், ஜிஎஸ்டி 2.0 மாற்றங்கள் ராயல் என்பீல்ட் வாடிக்கையாளர்களின் வாங்கும் முடிவுகள் மாறக்கூடும். குறைந்த செலவில் பைக் வாங்க நினைப்பவர்கள் 350cc மாடல்களை தேர்வு செய்யலாம். அதே நேரத்தில், அட்வென்சர் மற்றும் பிரீமியம் பைக்குகளை விரும்புபவர்கள் தங்கள் பட்ஜெட்டை மீண்டும் கணக்கிட்டு முடிவு எடுக்க வேண்டிய நிலை உருவாகியுள்ளது. புக் செய்யும் முன் புதிய விலைகளை சரிபார்ப்பது இப்போது மிக அவசியமாகியுள்ளது.