இந்தியாவுக்கு மேலும் வரி... டிரம்ப் - புடின் பேச்சுவார்த்தை தோல்வி அடைந்தால் அதோ கதிதான்!

ரஷ்யாவிடமிருந்து கச்சா எண்ணெய் வாங்குவதால், இந்தியாவுக்கு எதிரான வர்த்தக வரிகளை அதிகரிக்க வாய்ப்புள்ளதாக அமெரிக்க கருவூலத்துறை செயலர் ஸ்காட் பெசென்ட் எச்சரித்துள்ளார். இது குறித்து அவர், "அமெரிக்க அதிபர் டொனால்ட் டிரம்ப் மற்றும் ரஷ்ய அதிபர் விளாடிமிர் புதின் இடையேயான சந்திப்பு திருப்திகரமாக அமையாவிட்டால், இந்த நடவடிக்கை எடுக்கப்படும்" என்று தெரிவித்துள்ளார்.

அமெரிக்க அதிபர் டிரம்ப், ஏற்கனவே ரஷ்யாவிடம் இருந்து எண்ணெய் மற்றும் ஆயுதங்களை வாங்கியதற்காக இந்தியாவின் மீது 25% வரி விதித்திருந்த நிலையில், தற்போது மேலும் ஒரு 25% அபராத வரியை விதித்தார். இதன் மூலம் இந்தியாவின் மீது மொத்தம் 50% வரி விதிக்கப்பட்டுள்ளது. இந்தப் புதிய 50% வரி ஆகஸ்ட் 27-ஆம் தேதி முதல் நடைமுறைக்கு வர உள்ளது.

உக்ரைனில் போரை முடிவுக்குக் கொண்டு வர, ரஷ்யாவுடன் அமெரிக்கா பேச்சுவார்த்தை நடத்தி வருகிறது. இந்த வெள்ளிக்கிழமை, அலாஸ்காவில் டிரம்ப்-புதின் சந்திப்பு நடைபெற உள்ளது. உக்ரைன் போரை முடிவுக்குக் கொண்டு வர ரஷ்யா ஒப்புக் கொள்ளவில்லை என்றால், கடுமையான விளைவுகளைச் சந்திக்க நேரிடும் என்று டிரம்ப் எச்சரித்துள்ளார். மேலும், இந்தத் தடைகளில் ஐரோப்பிய நாடுகளும் இணைய வேண்டும் என்று பெசென்ட் வலியுறுத்தியுள்ளார்.

உக்ரைன் போர் தொடங்கியதிலிருந்து, இந்தியா மலிவான ரஷ்ய கச்சா எண்ணெயை அதிக அளவில் இறக்குமதி செய்து வருகிறது. 2021-ல் 3% ஆக இருந்த ரஷ்ய எண்ணெய் இறக்குமதி, 2024-ல் 35% முதல் 40% ஆக அதிகரித்துள்ளது. "கோடிக்கணக்கான ஏழை இந்தியர்களை அதிகரித்து வரும் விலையிலிருந்து பாதுகாக்க, மலிவான கச்சா எண்ணெயை வாங்க வேண்டியது அவசியமாகும்," என இந்தியா தனது ரஷ்ய எண்ணெய் கொள்முதலை நியாயப்படுத்தியுள்ளது.

அமெரிக்க அதிபர் டிரம்ப், இந்தியா சுங்கவரி துஷ்பிரயோகம் செய்வதாகக் குற்றம் சாட்டியுள்ளார். அமெரிக்காவின் பொருளாதாரத்தை மேம்படுத்தவும், உலகளாவிய வர்த்தகம் மேலும் நியாயமான முறையில் நடக்கவும் இந்த வரிகள் உதவும் என்று அவர் கூறியுள்ளார். ஆசியாவின் மூன்றாவது பெரிய பொருளாதாரமான இந்தியாவுடன், அமெரிக்காவுக்கு உள்ள 45 பில்லியன் டாலர் வர்த்தகப் பற்றாக்குறையைக் குறைக்கவும் அவர் ஆர்வமாக உள்ளார்.

கடந்த பல மாதங்களாக இந்தியா-அமெரிக்கா இடையே வர்த்தகப் பேச்சுவார்த்தைகள் நடைபெற்று வருகின்றன. இந்தப் பேச்சுவார்த்தைகள் ஆகஸ்ட் 25-ஆம் தேதி முதல் மீண்டும் தொடங்கும் என எதிர்பார்க்கப்படுகிறது. ஆனால், விவசாயம் மற்றும் பால் பொருட்கள் மீதான வரிகளைக் குறைக்க இந்தியா மறுப்பது இந்த பேச்சுவார்த்தைகளில் பெரும் சிக்கலை ஏற்படுத்தியுள்ளது.

புதிய 50% வரி, இந்தியாவின் ஏற்றுமதி சார்ந்த தொழில்களான ஜவுளி மற்றும் நகைத் தொழில்களை கடுமையாகப் பாதிக்கும் என்று நிபுணர்கள் கூறுகின்றனர். இது இந்தியாவின் வளர்ச்சி விகிதத்தை அரை சதவீதம் வரை குறைக்கும் என்றும் எச்சரிக்கப்பட்டுள்ளது.