இந்திய ஐடி ஊழியர்களுக்கு பெரும் தலைவலி! H-1B விசா விதியில் முக்கிய மாற்றம்!

அமெரிக்க வெளியுறவுத்துறை, 'நேர்காணல் தள்ளுபடி திட்டம்' (Interview Waiver Programme) எனப்படும் 'டிராப்பாக்ஸ்' (Dropbox) வசதியை செப்டம்பர் 2 முதல் ரத்து செய்துள்ளது. இதன் மூலம், H-1B, L1 மற்றும் F1 விசா விண்ணப்பதாரர்கள் உட்பட பெரும்பாலான குடியேற்றமற்ற விசா விண்ணப்பதாரர்கள், அமெரிக்க தூதரகங்கள் அல்லது துணைத் தூதரகங்களில் நேரில் நேர்காணலுக்குச் செல்ல வேண்டும்.

இந்த நடவடிக்கை இந்திய தொழில்நுட்ப ஊழியர்களுக்குப் பெரும் பாதிப்பை ஏற்படுத்தும் என்று எதிர்பார்க்கப்படுகிறது. ஏனெனில், உலகளவில் H-1B விசா பெறுபவர்களில் இந்தியர்கள் பெரும்பான்மையாக உள்ளனர்.

விசா வல்லுநர்கள் எச்சரிப்பதாவது, விசா நேர்காணலுக்காக இந்தியாவிலுள்ள விண்ணப்பதாரர்கள் நீண்ட நேரம் காத்திருக்க நேரிடும். இதனால் பயண தாமதங்கள் ஏற்படலாம், மேலும் சரியான நேரத்தில் திரும்ப முடியாவிட்டால் அவர்களின் பணி அங்கீகாரத்தை இழக்கும் அபாயமும் உள்ளது. எனவே, விண்ணப்பதாரர்கள் முன்கூட்டியே திட்டமிட்டு, நேர்காணல் இடங்களை உன்னிப்பாகக் கவனிக்க வேண்டும் என்று வல்லுநர்கள் வலியுறுத்துகின்றனர்.

இதுவரை, தகுதியுள்ள பயணிகளுக்கு 'டிராப்பாக்ஸ்' வசதி பெரும் உதவியாக இருந்தது. இதன் மூலம், அவர்கள் நேரில் நேர்காணலுக்குச் செல்லாமல், ஒரு குறிப்பிட்ட மையத்தில் தங்கள் ஆவணங்களைச் சமர்ப்பித்து விசாவைப் பெற்று வந்தனர்.

புதிய விதிகளின் கீழ், ஒரு சில பிரிவினருக்கு மட்டும் நேர்காணல் தள்ளுபடி செய்யப்பட்டுள்ளது.

• தூதரக மற்றும் அரசு விசா விண்ணப்பதாரர்கள் (A-1, A-2, C-3, G-1 முதல் G-4, NATO-1 முதல் NATO-6 மற்றும் TECRO E-1).

• இதற்கு முன் B-1, B-2 அல்லது B1/B2 விசாக்களைப் புதுப்பிப்பவர்கள், அவர்களின் முந்தைய விசா காலாவதியான 12 மாதங்களுக்குள் விண்ணப்பித்தால், அவர்களுக்கும் நேர்காணல் தள்ளுபடி உண்டு. ஆனால், முந்தைய விசா வழங்கப்பட்டபோது அவர்களுக்கு குறைந்தபட்சம் 18 வயது ஆகியிருக்க வேண்டும்.

இந்த மாற்றங்கள் அமெரிக்காவின் தொழில்நுட்பத் துறையிலும் பெரிய தாக்கத்தை ஏற்படுத்தும். அங்குள்ள நிறுவனங்கள் திறமையான பணியாளர்களை வேலைக்கு அமர்த்துவதற்கு H-1B விசாக்கள் முக்கியப் பங்காற்றுகின்றன. இவர்களில் பெரும்பாலானோர் இந்தியர்கள்.

2022ஆம் ஆண்டில், வழங்கப்பட்ட 3,20,000 H-1B விசாக்களில் 77% இந்தியர்களுக்கு வழங்கப்பட்டுள்ளன. 2023ஆம் நிதியாண்டில், 3,86,000 விசாக்களில் 72.3% இந்தியர்களுக்கு வழங்கப்பட்டுள்ளன.

சான் பிரான்சிஸ்கோ பல்கலைக்கழகத்தின் பேராசிரியர் பில் ஹிங் (Bill Hing) கூறுகையில், "புதிய விதிகள் மூலம் நேர்காணலைக் கட்டாயமாக்குவது விசா செயலாக்கத்தை தாமதப்படுத்தும். இதனால், விசா வைத்திருப்பவர்கள் இந்தியா அல்லது சீனா போன்ற நாடுகளில் சிக்கி, வேலைக்குத் திரும்ப முடியாமல் போகலாம். இது அவர்களுக்கு பெரும் செலவை ஏற்படுத்தும்" என்கிறார்.

"இந்தியாவிலுள்ள துணைத் தூதரகங்களில் காத்திருப்பு நேரம் மிக மிக அதிகமாகும் என்று நாங்கள் எதிர்பார்க்கிறோம். சரியான நேரத்தில் நேர்காணல் அழைப்பு கிடைக்கவில்லை என்றால், H-1B ஊழியர்கள் தங்கள் வேலையை இழக்க நேரிடும்" என குடியேற்ற சட்ட நிறுவனத்தின் பங்குதாரரான கெல்லி டியூனிங் (Kelli Duehning) கூறுகிறார்.