ஜியோ, ஏர்டெல்-க்கு இனி டஃப் பைட் தான்! சாட்டிலைட் இன்டர்நெட் கட்டணம் உயராது.. டிராய் எடுத்த அதிரடி முடிவு!

இந்தியத் தொலைத்தொடர்பு ஒழுங்குமுறை ஆணையம் (TRAI), சாட்டிலைட் இன்டர்நெட் சேவைகளுக்கான ஸ்பெக்ட்ரம் கட்டணங்கள் குறித்த தனது முந்தைய பரிந்துரைகளில் உறுதியாக இருப்பதாகத் தெரிவித்துள்ளது. தொலைத்தொடர்புத் துறை (DoT) முன்மொழிந்த மாற்றங்களை நிராகரித்து, டிராய் இந்த முடிவை எடுத்துள்ளது. இது எலான் மஸ்கின் ஸ்டார்லிங்க் (Starlink) மற்றும் ஜியோ போன்ற நிறுவனங்கள் இந்தியாவில் சேவையைத் தொடங்க வழிவகுக்கும் சாதகமான சூழலை உருவாக்கியுள்ளது.

சாட்டிலைட் ஸ்பெக்ட்ரம் ஒதுக்கீட்டிற்கான கட்டணங்கள் குறித்து டிராய் அளித்த பரிந்துரைகளில் சில மாற்றங்களைச் செய்யுமாறு தொலைத்தொடர்புத் துறை (DoT) கேட்டிருந்தது. குறிப்பாக, வருடாந்திர ஸ்பெக்ட்ரம் கட்டணத்தை 4 சதவீதத்திலிருந்து 5 சதவீதமாக உயர்த்த DoT விரும்பியது. அதே சமயம், மலைப்பாங்கான மற்றும் எல்லைப் பகுதிகளில் அதிக இணைப்புகளை வழங்கினால் 1% தள்ளுபடி வழங்கலாம் எனவும் கூறியிருந்தது. ஆனால், "கடினமான பகுதிகளில் இணைப்பு வழங்குவதற்காகச் சலுகைகளுடன் கூடிய 5 சதவீத கட்டண உயர்வை ஏற்க முடியாது" என்று டிராய் திட்டவட்டமாகத் தெரிவித்துள்ளது.

நகர்ப்புறங்களில் ஒவ்வொரு சாட்டிலைட் இணைப்புக்கும் ஆண்டுக்கு ரூ.500 கட்டணம் வசூலிக்க வேண்டும் என்ற தனது பழைய நிலைப்பாட்டையும் டிராய் தக்கவைத்துள்ளது. கிராமப்புற மற்றும் தொலைதூரப் பகுதிகளுக்கு இந்தக் கட்டணத்திலிருந்து விலக்கு அளிக்கப்பட்டுள்ளது. நகர்ப்புற மக்கள் அதிக டேட்டாவை பயன்படுத்துவதாலும், அவர்களிடம் வாங்கும் திறன் அதிகம் இருப்பதாலும் இந்தக் கட்டணம் நியாயமானது என டிராய் கருதுகிறது. இக்கட்டணம் இல்லையெனில், நிறுவனங்கள் லாபம் தரும் நகர்ப்புறங்களில் மட்டுமே கவனம் செலுத்தும் என்றும், கிராமப்புறங்களைப் புறக்கணிக்க வாய்ப்புள்ளது என்றும் டிராய் எச்சரித்துள்ளது.

டிராய் இந்த கட்டண உயர்வை நிராகரித்துள்ளதால், எலான் மஸ்கின் ஸ்டார்லிங்க் மற்றும் ஏர்டெல் ஒன்வெப் (OneWeb), ஜியோ சாட்டிலைட் போன்ற நிறுவனங்கள் தங்கள் சேவைக் கட்டணங்களை உயர்த்த வேண்டிய அவசியம் இருக்காது. டிராய் பரிந்துரைகளை அரசு அப்படியே ஏற்றுக் கொண்டால், திட்டமிட்ட விலையிலேயே இந்தியாவில் சாட்டிலைட் இன்டர்நெட் சேவைகள் விரைவில் தொடங்கப்படும். இது வாடிக்கையாளர்களுக்குப் பெரும் நிம்மதியை அளித்துள்ளது.

டிராய் தனது பரிந்துரைகளை மீண்டும் வலியுறுத்தியுள்ள நிலையில், பந்து இப்போது தொலைத்தொடர்புத் துறையின் (DoT) பக்கம் உள்ளது. இந்த பரிந்துரைகளை ஏற்பதா அல்லது நிராகரிப்பதா என்பதை DoT தான் முடிவு செய்ய வேண்டும். டிராயின் பரிந்துரைகள் ஏற்கப்பட்டால், ஸ்பெக்ட்ரம் ஒதுக்கீடு விரைவாக நடைபெறும். அதேசமயம், மலைப்பகுதிகள் மற்றும் தீவுகளில் இணையச் சேவையை விரிவுபடுத்த அரசு தனியாகச் சிறப்புத் திட்டங்களை வகுக்கலாம் என்றும் டிராய் சுட்டிக்காட்டியுள்ளது.