Emotion AI : இனி உங்கள் கார் உங்களிடம் பேசும்... உங்கள் சோகத்தை போன் புரிந்துகொள்ளும்! இது 'Emotion AI' காலம்!

செயற்கை நுண்ணறிவு (AI) இதுவரை கவிதை எழுதியது, படம் வரைந்தது, கேள்விகளுக்குப் பதில் சொன்னது. ஆனால் இப்போது அது அடுத்த கட்டத்திற்குச் சென்றுவிட்டது. ஆம், இனி AI-யால் சிரிக்க முடியும், உங்கள் குரலில் உள்ள சோகத்தை உணர முடியும், நீங்கள் கோபமாக இருந்தால் அதற்கேற்ப பதில் சொல்ல முடியும். இதுதான் 'Emotion-Aware Technology' அல்லது 'Emotion AI'.

நம் முகபாவனைகள் (Facial Expressions), குரலின் ஏற்ற இறக்கம் (Voice Tone), மற்றும் கண் அசைவுகளை வைத்து நாம் என்ன மனநிலையில் இருக்கிறோம் என்பதைத் துல்லியமாகக் கண்டுபிடிப்பதே இந்தத் தொழில்நுட்பம். உதாரணத்திற்கு, Hume AI போன்ற நிறுவனங்கள் உருவாக்கியுள்ள 'Empathic Voice Interface' (EVI) நீங்கள் பேசும்போது உங்கள் குரலில் உள்ள நடுக்கத்தை வைத்து நீங்கள் பயத்தில் இருக்கிறீர்களா அல்லது மகிழ்ச்சியில் இருக்கிறீர்களா என்பதைக் கண்டறிந்து, அதற்கேற்ப ஆறுதலாகப் பேசும்.

இனிமேல் காரை ஓட்டும்போது நீங்கள் தூங்கினால் அல்லது கவனச் சிதறலோடு இருந்தால், கார் உங்களை எச்சரிக்கும்.

• Volvo மற்றும் Mercedes போன்ற நிறுவனங்கள் 'Driver Monitoring System' என்ற வசதியைக் கொண்டு வருகின்றன.

• Smart Eye என்ற தொழில்நுட்பம் டிரைவரின் கண்களை ஸ்கேன் செய்து, அவர் மது அருந்தியிருக்கிறாரா அல்லது சோர்வாக இருக்கிறாரா என்பதைக் கண்டறிந்து விபத்தைத் தடுக்கும். ஐரோப்பாவில் 2026-ல் இது கட்டாயமாக்கப்படவுள்ளது.

சில நிறுவனங்கள் ஆன்லைன் இன்டர்வியூவின் போது, விண்ணப்பதாரரின் முகபாவனைகளை AI மூலம் ஆராய்ந்து, அவர் நம்பிக்கையாகப் பேசுகிறாரா அல்லது பதற்றப்படுகிறாரா என்று கண்டுபிடிக்கின்றன. Zoom நிறுவனம் கூட விற்பனைப் பிரிவில் (Sales Calls) வாடிக்கையாளரின் மனநிலையை அறிய இத்தகைய முயற்சியை மேற்கொண்டது, ஆனால் அதற்குப் பெரும் எதிர்ப்பு கிளம்பியது.

இது கேட்பதற்கு நன்றாக இருந்தாலும், இதில் பெரிய ஆபத்துகளும் உள்ளன. ஒருவரின் அனுமதியின்றி அவர் மனநிலையை AI ஆராய்வது தனிமனித சுதந்திரத்திற்கு எதிரானது.

• இதனால், ஐரோப்பிய ஒன்றியம் (EU AI Act) பள்ளிகளிலும், அலுவலகங்களிலும் 'Emotion AI'-யைப் பயன்படுத்தக் கடும் தடை விதித்துள்ளது.

• மாணவர்கள் அல்லது ஊழியர்களின் உணர்வுகளைக் கண்காணிப்பது தவறான முன்னுதாரணம் என்று அது எச்சரிக்கிறது.

எது எப்படியோ, வரும் காலத்தில் நம்மை விட நம் மெஷின்களுக்கு நம்மைப் பற்றி அதிகம் தெரிந்திருக்கும் என்பது மட்டும் உறுதி!