5ஜி வேகத்தில் ஜியோ தான் 'கிங்'! ஏர்டெல், விஐ-யை பின்னுக்குத் தள்ளி முதலிடம்! வெளியான முக்கிய ரிப்போர்ட்!

இந்தியாவின் பிராட்பேண்ட் மற்றும் நெட்வொர்க் ஆய்வு நிறுவனமான ஓப்பன்சிக்னல் (Opensignal) வெளியிட்டுள்ள சமீபத்திய அறிக்கையின்படி, இந்தியாவின் 5ஜி சந்தையில் ரிலையன்ஸ் ஜியோ (Reliance Jio) அசுர வளர்ச்சி கண்டுள்ளது. டவுன்லோட் வேகம் (Download Speed), சிக்னல் கிடைப்பது (Availability) மற்றும் பயன்பாடு என அனைத்து வகையிலும் ஜியோ முதலிடத்தைப் பிடித்துள்ளது. செப்டம்பர் 1 முதல் நவம்பர் 30, 2025 வரை சேகரிக்கப்பட்ட தரவுகளின் அடிப்படையில் இந்த அறிக்கை வெளியிடப்பட்டுள்ளது. 4ஜி-யை விட 5ஜி பல மடங்கு வேகத்தை வழங்குவதாகவும் இதில் குறிப்பிடப்பட்டுள்ளது.

இந்த அறிக்கையின்படி, இணைய வேகத்தில் ஜியோ மற்ற நிறுவனங்களை விட வெகுவாக முன்னிலையில் உள்ளது.

• ஜியோ: வினாடிக்கு 199.7 எம்.பி.பி.எஸ் (Mbps) வேகத்தைப் பதிவு செய்துள்ளது. இது அதன் 4ஜி வேகத்தை விட 11 மடங்கு அதிகமாகும்.

• ஏர்டெல்: 187.2 Mbps வேகத்துடன் இரண்டாவது இடத்தில் உள்ளது. இது அதன் 4ஜி வேகத்தை விட 7 மடங்கு அதிகம்.

• வோடபோன் ஐடியா (Vi): 138.1 Mbps வேகத்தைப் பதிவு செய்துள்ளது. இது அதன் 4ஜி வேகத்தை விட 6 மடங்கு அதிகமாகும்.

வேகம் மட்டுமின்றி, 4ஜி-யை ஒப்பிடும்போது 5ஜி சேவையில் இணையத் தடங்கல்கள் மிகவும் குறைவாகவே ஏற்படுவதாகவும் அறிக்கை சுட்டிக்காட்டியுள்ளது.

பயனர்கள் எவ்வளவு நேரம் உண்மையில் 5ஜி நெட்வொர்க்கில் இணைந்திருக்கிறார்கள் என்பதைக் கணக்கிட "டைம் ஆன் 5ஜி" (Time on 5G) என்ற புதிய அளவுகோலை ஓப்பன்சிக்னல் பயன்படுத்தியது. இதிலும் ஜியோவே ஆதிக்கம் செலுத்துகிறது.

ஜியோ: 68.1% அளவுக்கு 5ஜி சிக்னல் கிடைக்கிறது. ஜியோ பயனர்கள் தங்கள் போன் பயன்பாட்டு நேரத்தில் 67.3% நேரம் 5ஜி-யில் இணைந்திருக்கிறார்கள். ஜியோவின் 'ஸ்டாண்ட் அலோன்' (SA) தொழில்நுட்பம் மற்றும் 700 MHz அலைக்கற்றை பயன்பாடு இதற்கு முக்கியக் காரணமாகும். இது கட்டிடங்களுக்கு உள்ளேயும் சிறப்பான சிக்னலை வழங்குகிறது.

• ஏர்டெல்: 66.6% அளவுக்கு 5ஜி சிக்னல் கிடைத்தாலும், பயனர்கள் வெறும் 28% நேரம் மட்டுமே 5ஜி-யில் இணைந்திருக்கிறார்கள். ஏர்டெல் 'நான்-ஸ்டாண்ட் அலோன்' (NSA) தொழில்நுட்பத்தைப் பயன்படுத்துவதால், கட்டுப்பாட்டு சிக்னல்களுக்கு அது இன்னும் 4ஜி-யையே நம்பியிருக்கிறது. இதுவே பயன்பாட்டு நேரம் குறையக் காரணமாகக் கூறப்படுகிறது.

• விஐ: 32.5% அளவுக்கு மட்டுமே 5ஜி சிக்னல் கிடைக்கிறது. பயனர்கள் 9.7% நேரம் மட்டுமே 5ஜி-யில் இணைந்திருக்கிறார்கள். விஐ இன்னும் ஆரம்பக்கட்ட விரிவாக்கத்தில் உள்ளதால் இந்த நிலை உள்ளது.

தற்போது 10,000 ரூபாய்க்கும் குறைவான விலையில் 5ஜி ஸ்மார்ட்போன்கள் கிடைப்பதால், பயன்பாடு அதிகரித்து வருகிறது. இது நெட்வொர்க் மீது அதிக அழுத்தத்தை ஏற்படுத்தும். "அளவை விரிவுபடுத்துவதோடு மட்டுமல்லாமல், நிலையான வேகத்தையும் தரத்தையும் வழங்கும் நிறுவனமே இந்தியாவின் டிஜிட்டல் பயணத்தில் வெற்றி பெறும்" என்று ஓப்பன்சிக்னல் அறிக்கை முடிவாகக் கூறியுள்ளது.