வேற லெவல் ரீச்.. புதினுக்கு கொடுத்த அந்த கிப்ட்! எக்ஸ் தளத்தையே அதிர வைத்த பிரதமர் மோடி!

சமூக வலைத்தளங்களில் ஒன்றான 'எக்ஸ்' (முன்பு ட்விட்டர்), சமீபத்தில் ஒரு புதிய வசதியை அறிமுகப்படுத்தியுள்ளது. இதன் மூலம் ஒரு குறிப்பிட்ட நாட்டில், ஒரு மாதத்தில் அதிகம் 'லைக்' (Like) செய்யப்பட்ட பதிவுகள் எவை என்பதை அறிந்து கொள்ள முடியும். இந்தத் தரவரிசைப் பட்டியல் வெளியானதுமே, பிரதமர் நரேந்திர மோடியின் டிஜிட்டல் செல்வாக்கு எந்த அளவுக்கு வலிமையாக உள்ளது என்பது மீண்டும் ஒருமுறை நிரூபிக்கப்பட்டுள்ளது.

உலகளவில் அதிக ஃபாலோயர்களைக் கொண்ட அரசியல் தலைவர்களுள் ஒருவரான பிரதமர் மோடி, இந்திய அளவில் அதிக ஈடுபாட்டைப் (Engagement) பெற்ற தலைவராகத் திகழ்கிறார். கடந்த 30 நாட்களுக்கான எக்ஸ் தளத்தின் தரவுகளைப் பார்க்கும்போது, இந்தியாவில் அதிகம் விரும்பப்பட்ட முதல் 10 பதிவுகளில் (Top 10 Most-liked Tweets), 8 பதிவுகள் பிரதமர் மோடியுடையது என்பது குறிப்பிடத்தக்கது. இந்தப் பட்டியலில் வேறு எந்த இந்திய அரசியல் தலைவரும் இடம்பெறவில்லை என்பது மோடியின் தனித்துவமான சமூக வலைத்தள ஆளுமையைக் காட்டுகிறது.

கடந்த மாதத்தில் இந்திய அளவில் அதிகம் லைக் செய்யப்பட்ட பதிவாக, பிரதமர் மோடி ரஷ்ய அதிபர் விளாடிமிர் புதினுக்கு பகவத் கீதையின் ரஷ்ய மொழிபெயர்ப்பை பரிசாக வழங்கிய புகைப்படம் இடம்பிடித்துள்ளது. இந்தப் பதிவு மட்டும் சுமார் 2.3 மில்லியனுக்கும் அதிகமான லைக்குகளைப் பெற்றுள்ளது. மேலும், 6.7 மில்லியன் மக்களைச் சென்றடைந்தது மட்டுமின்றி, சுமார் 29,000 பயனர்களால் பகிரவும் (Reshare) செய்யப்பட்டுள்ளது.

எக்ஸ் தளம் அறிமுகப்படுத்தியுள்ள இந்தப் புதிய வசதி, பயனர்களுக்குத் தங்கள் பிராந்தியத்தில் எந்த வகையான உள்ளடக்கம் அதிகம் ரசிக்கப்படுகிறது என்பதைத் தெரிந்துகொள்ள உதவுகிறது. பொதுவாக எக்ஸ் தளம் ஒவ்வொரு ஆண்டும் விராட் கோலி, பிரதமர் மோடி மற்றும் முக்கிய நிகழ்வுகளை மையமாக வைத்து "Year in Review" பட்டியலை வெளியிடுவது வழக்கம். அந்த வகையில், 2025 ஆம் ஆண்டிற்கான அதிகாரப்பூர்வமான 'அதிகம் லைக் செய்யப்பட்ட பதிவுகள்' பட்டியல் அடுத்த மாதம் வெளியாகும் என்று எதிர்பார்க்கப்படுகிறது.

பயனர் ஈடுபாட்டைத் தாண்டி, 'எக்ஸ்' தளம் நீண்ட நாட்களாகச் செயல்படாமல் இருக்கும் கணக்குகளின் பெயர்களை (Usernames) மற்றவர்களுக்கு வழங்கும் புதிய திட்டத்தையும் அறிமுகப்படுத்தியுள்ளது. 'எக்ஸ் ஹேண்டில் மார்க்கெட் பிளேஸ்' (X Handle Marketplace) மூலம், நீண்ட காலமாக முடங்கிக் கிடக்கும் பயனர் பெயர்கள் மீண்டும் பயன்பாட்டிற்குக் கொண்டுவரப்படுகின்றன.

இந்த வசதியானது தற்போது பிரீமியம்+ (Premium+) மற்றும் பிரீமியம் பிசினஸ் சந்தாதாரர்களுக்கு மட்டுமே கிடைக்கிறது. தகுதிவாய்ந்த பயனர்கள், தங்களின் பிராண்ட் அல்லது தனிப்பட்ட அடையாளத்தை மேம்படுத்த, செயல்படாத கணக்குகளின் பெயர்களைத் தேடிக் கோரலாம். எக்ஸ் தளத்தைப் பொறுத்தவரை, 30 நாட்கள் லாக்-இன் செய்யாத கணக்குகள் 'செயல்படாதவை' (Inactive) எனக் குறிக்கப்படும். 6 மாதங்களுக்குப் பிறகு அவை நீக்கப்படலாம். இருப்பினும், ஸ்பேம் மற்றும் அடையாளத் திருட்டைத் தடுக்க, இந்தப் பெயர்கள் பொதுவெளியில் நேரடியாக விடப்படாமல் பாதுகாக்கப்பட்டே வருகின்றன.