டீன் ஏஜ் இன்ஸ்டாகிராம் பயனர்களுக்கு இவ்வளவு கட்டுபாடா? என்னனு தெரிந்துகொள்ளுங்கள்…

சமூக ஊடகமான இன்ஸ்டாகிராமில் 16 வயதுக்குட்பட்ட இளம் பயனர்களின் பாதுகாப்பை உறுதிப்படுத்தும் நோக்கில் மெட்டா நிறுவனம் புதிய கட்டுப்பாடுகளை விதித்துள்ளது. இனிமேல், இந்த வயதுக்குட்பட்ட பயனர்கள் நேரலை ஒளிபரப்பு (Livestream) செய்யவோ அல்லது நேரடி செய்திகளில் (Direct Messages) உள்ள தேவையில்லாத உள்ளடக்கம் இருப்பதாக சந்தேகிக்கப்படும் படங்களை தெளிவுபடுத்தவோ பெற்றோரின் அனுமதியைப் பெற வேண்டும் என்று அந்நிறுவனம் அறிவித்துள்ளது.

இதோடு மட்டுமல்லாமல், பேஸ்புக் மற்றும் மெசஞ்சர் போன்ற பிற சமூக ஊடகங்களிலும் 18 வயதுக்குட்பட்ட பயனர்களுக்கான 'டீன் அக்கவுண்ட்ஸ்' (Teen Accounts) பாதுகாப்பு அம்சங்களை விரிவுபடுத்துவதாகவும் மெட்டா தெரிவித்துள்ளது. கடந்த ஆண்டு செப்டம்பர் மாதம், இளம் பருவத்தினரின் ஆன்லைன் செயல்பாடுகளை கண்காணிக்கவும், சமூக ஊடகங்களின் தாக்கம் குறித்த கவலைகளை குறைக்கவும் 'டீன் அக்கவுண்ட்' திட்டத்தை மெட்டா அறிமுகப்படுத்தியது குறிப்பிடத்தக்கது.

மார்க் ஜுக்கர்பெர்க் தலைமையிலான மெட்டா நிறுவனத்தின் இந்த புதிய மாற்றங்களின்படி, 16 வயதுக்குட்பட்ட இளம் பயனர்கள் தங்கள் பெற்றோர் அனுமதி அளித்தால் மட்டுமே இன்ஸ்டாகிராம் லைவ் அம்சத்தை பயன்படுத்த முடியும். மேலும், நேரடி செய்திகளில் உள்ள தேவையில்லாத படங்கள் என்று கருதப்படும் உள்ளடக்கத்தை தெளிவுபடுத்தும் வசதியை அவர்கள் இயக்கவும் பெற்றோரின் ஒப்புதல் அவசியம் என்று மெட்டா கூறியுள்ளது.

இந்த புதிய விதிமுறைகள் முதலில் அமெரிக்கா, பிரிட்டன், கனடா மற்றும் ஆஸ்திரேலியா ஆகிய நாடுகளில் அறிமுகப்படுத்தப்படும் என்றும், பின்னர் வரும் மாதங்களில் உலகளாவிய பயனர்களுக்கு இது விரிவுபடுத்தப்படும் என்றும் தெரிவிக்கப்பட்டுள்ளது.

பேஸ்புக்கிலும் மெசஞ்சரிலும் 'டீன் அக்கவுண்ட்ஸ்'

கூடுதலாக, பேஸ்புக் மற்றும் மெசஞ்சரில் அறிமுகப்படுத்தப்படவுள்ள 'டீன் அக்கவுண்ட்ஸ்' அமைப்புகளில், டீன் ஏஜ் இன்ஸ்டாகிராம் பயனர்களுக்கு ஏற்கனவே உள்ள பாதுகாப்பு அம்சங்கள் இடம்பெறும். இதன் மூலம், டீன் ஏஜ் கணக்குகள் தானாகவே தனிப்பட்ட கணக்குகளாக (Private) அமைவது, அறிமுகமில்லாத நபர்களிடமிருந்து வரும் தனிப்பட்ட செய்திகள் தடுக்கப்படுவது, சண்டைக்காட்சிகள் போன்ற உணர்திறன் மிக்க உள்ளடக்கங்களுக்கு கடுமையான கட்டுப்பாடுகள் விதிப்பது, 60 நிமிடங்களுக்கு மேல் செயலி பயன்படுத்தினால் வெளியேற நினைவூட்டல் அனுப்புவது மற்றும் படுக்கை நேரத்தில் அறிவிப்புகள் நிறுத்தப்படுவது போன்ற வசதிகள் இருக்கும்.

மெட்டா நிறுவனம் இதுகுறித்து கூறுகையில், "பேஸ்புக் மற்றும் மெசஞ்சரில் உள்ள 'டீன் அக்கவுண்ட்ஸ்' பொருத்தமற்ற உள்ளடக்கம் மற்றும் தேவையற்ற தொடர்புகளை கட்டுப்படுத்தவும், இளம் பருவத்தினர் தங்கள் நேரத்தை பயனுள்ள வகையில் செலவிடுவதை உறுதிப்படுத்தவும் இதேபோன்ற தானியங்கி பாதுகாப்புகளை வழங்கும்" என்று தெரிவித்துள்ளது.

'டீன் அக்கவுண்ட்ஸ்' திட்டம் தொடங்கப்பட்டதிலிருந்து, மெட்டாவின் சமூக ஊடக தளங்களில் குறைந்தது 54 மில்லியன் கணக்குகள் உருவாக்கப்பட்டுள்ளதாக அந்நிறுவனம் தெரிவித்துள்ளது.

சமீபத்திய ஆண்டுகளில், இளம் பருவத்தினர் சமூக வலைப்பின்னல்களை அதிகளவில் பயன்படுத்துவது கவலைகளை ஏற்படுத்தியுள்ளது. குறிப்பாக அவர்கள் திரையில் செலவிடும் நேரம் மற்றும் சில தளங்களில் முறையான கட்டுப்பாடு இல்லாதது போன்ற காரணங்களால் இந்த கவலைகள் அதிகரித்துள்ளன. இந்த சிக்கலை கட்டுப்படுத்தும் விதமாக, ஆஸ்திரேலிய நாடாளுமன்றம் கடந்த ஆண்டு நவம்பரில் 16 வயதுக்குட்பட்டவர்கள் சமூக ஊடகங்களைப் பயன்படுத்துவதற்கு தடை விதிக்கும் சட்டத்திற்கு ஆதரவாக வாக்களித்தது குறிப்பிடத்தக்கது.

மேலும், டிக்டாக் சமீபத்தில் ஐரோப்பிய ஒன்றியத்தில் ஒரு புதிய அம்சத்தை அறிமுகப்படுத்தியுள்ளது. இதன் மூலம் பெற்றோர்கள் தங்கள் டீன் ஏஜ் குழந்தைகளின் பயன்பாட்டு நேரத்தை கட்டுப்படுத்த முடியும்.

இளம் பயனர்களின் பாதுகாப்பை உறுதிப்படுத்த மெட்டா எடுத்துள்ள இந்த புதிய நடவடிக்கைகள் வரவேற்கத்தக்கது. பெற்றோர்கள் தங்கள் பிள்ளைகளின் ஆன்லைன் செயல்பாடுகளை கண்காணிக்கவும், அவர்களை தீங்கு விளைவிக்கும் உள்ளடக்கங்களிலிருந்து பாதுகாக்கவும் இது உதவும் என்று நம்பப்படுகிறது.

இதையும் படிங்க: டிக்டாக்கை வீழ்த்த இன்ஸ்டாகிராம் பலே திட்டம் ! தேடலில் இனி வேற லெவல் சம்பவம்!