உஷார்... போன்ல சிக்னல் போனா... பேங்க்ல இருந்து பணம் பறிபோகும்! இது புது eSIM மோசடி!

மத்திய அரசின் உள்துறை அமைச்சகத்தால் ஜனவரி 2020-ல் நிறுவப்பட்ட இந்திய சைபர் கிரைம் ஒருங்கிணைப்பு மையம் (I4C), நாட்டில் சைபர் குற்றங்களைத் தடுக்கவும், சட்ட அமலாக்க அமைப்புகளுக்கு இடையே ஒருங்கிணைப்பை மேம்படுத்தவும் செயல்பட்டு வருகிறது. இந்த அமைப்பு, சமீபத்தில் அதிகரித்து வரும் புதிய வகை இ-சிம் (eSIM) மோசடி குறித்து பொதுமக்களுக்கு புதிய எச்சரிக்கையை விடுத்துள்ளது.

I4C அளித்த தகவல்படி, மோசடி செய்பவர்கள் முதலில் பாதிக்கப்பட்டவர்களுக்கு தொலைபேசி மூலம் அழைப்பு விடுக்கின்றனர். பின்னர், அவர்களின் ஃபோனுக்கு இ-சிம் ஆக்டிவேஷன் லிங்கை அனுப்புகின்றனர். அந்த லிங்கை பயனர் கிளிக் செய்தால், அவர்களின் ஃபிசிகல் சிம் கார்டை இ-சிம்மாக மாற்றுவதற்கான கோரிக்கை தானாகவே ஏற்றுக்கொள்ளப்படுகிறது.

இதன் விளைவாக, பயனரின் ஃபிசிகல் சிம் வேலை செய்வதை நிறுத்திவிடும். அவருக்கு நெட்வொர்க் சிக்னல் கிடைக்காது. இதற்குப் பிறகு, அனைத்து அழைப்புகள் மற்றும் குறுஞ்செய்திகள், வங்கி அனுப்பும் OTP-கள் உட்பட, அனைத்தும் மோசடி செய்பவர்களின் கட்டுப்பாட்டில் உள்ள இ-சிம்-க்கு திருப்பிவிடப்படும்.

பின்னர், மோசடி செய்பவர்கள் பாதிக்கப்பட்டவரின் வங்கிக் கணக்கிலிருந்து பணத்தை மாற்ற முயற்சி செய்வார்கள். இதற்கு வங்கி அனுப்பும் OTP-கள் அவர்களுக்கே கிடைப்பதால், அவர்கள் எளிதாகப் பணத்தை எடுத்துவிடுவார்கள். இதுபோன்று ஒரு நபர், தனது ஏடிஎம் (ATM) மற்றும் யுபிஐ (UPI) அம்சங்களை செயலிழக்கச் செய்த பின்னரும், அவரது வங்கிக் கணக்கிலிருந்து ரூ. 4 லட்சத்தை மோசடி கும்பல் எடுத்துச் சென்றதாக I4C தெரிவித்துள்ளது.

I4C இந்த மோசடியைத் தவிர்க்க மூன்று முக்கியமான பாதுகாப்பு வழிமுறைகளையும் வழங்கியுள்ளது:

1. சந்தேகத்திற்குரிய அழைப்புகள் மற்றும் லிங்குகளை தவிர்க்கவும்: தெரியாத எண்களில் இருந்து வரும் அழைப்புகள் அல்லது இணைப்புகளைத் தவிர்த்து, எப்போதும் விழிப்புடன் இருக்க வேண்டும்.

2. இ-சிம் மாற்றத்தை நீங்களே மேற்கொள்ளவும்: இ-சிம் மாற்ற கோரிக்கையை பயனர்கள் நேரடியாக சம்பந்தப்பட்ட சேவை வழங்குநர் மூலம் மட்டுமே மேற்கொள்ள வேண்டும். நம்பகத்தன்மையற்ற எந்தவொரு ஆதாரத்தையும் நம்ப வேண்டாம்.

3. சிக்னல் கிடைக்கவில்லை என்றால் உடனடியாக புகார் அளிக்கவும்: உங்கள் ஃபோனில் நெட்வொர்க் சிக்னல் கிடைக்கவில்லை என்றால், உடனடியாக உங்கள் வங்கி மற்றும் தொலைத்தொடர்பு சேவை நிறுவனத்திற்குத் தெரிவிக்க வேண்டும்.

சமீபத்தில், தொலைத்தொடர்புத் துறையின் (DoT) நிதி மோசடி தடுப்பு அமைப்பான FRI, சுமார் 3 முதல் 4 லட்சம் சிம் கார்டுகளை மோசடி நடவடிக்கைகளில் ஈடுபட்டதாகக் கூறி பிளாக்லிஸ்ட் செய்தது குறிப்பிடத்தக்கது.