எலான் மஸ்க் சொத்து மதிப்பு எவ்ளோ தெரியுமா? வாயை பிளக்கும் உலக நாடுகள்!

உலகின் பெரும் பணக்காரரான எலான் மஸ்க் (Elon Musk) மீண்டும் ஒரு வரலாற்றுச் சாதனையை நோக்கி முன்னேறி வருகிறார். பிப்ரவரி 2026 நிலவரப்படி, அவரது மொத்த சொத்து மதிப்பு 850 பில்லியன் அமெரிக்க டாலர்களை (சுமார் ரூ.70 லட்சம் கோடி) எட்டியுள்ளது. இதன் மூலம், 800 பில்லியன் டாலர் மைல்கல்லைக் கடந்த முதல் நபர் என்ற பெருமையை அவர் பெற்றுள்ளார். கூகுள் நிறுவனர்களான லாரி பேஜ், செர்ஜி பிரின் மற்றும் ஃபேஸ்புக் நிறுவனர் மார்க் ஜூக்கர்பெர்க் ஆகிய மூவரின் மொத்த சொத்து மதிப்பை விட எலான் மஸ்கின் சொத்து மதிப்பு அதிகம் என்பது வியக்கத்தக்கது.

எலான் மஸ்கின் இந்த அசுர வளர்ச்சிக்கு முக்கியக் காரணம், அவரது விண்வெளி ஆய்வு நிறுவனமான ஸ்பேஸ் எக்ஸ் (SpaceX) மற்றும் செயற்கை நுண்ணறிவு நிறுவனமான xAI ஆகியவற்றின் இணைப்புதான். இந்த இரு நிறுவனங்களின் இணைப்புக்குப் பிறகு, அதன் மதிப்பு 1.25 டிரில்லியன் டாலராக உயர்ந்துள்ளது. இதில் எலான் மஸ்கிற்கு 43 சதவீத பங்குகள் உள்ளன. இதன் மதிப்பு மட்டும் சுமார் 530 பில்லியன் டாலராகும். அதாவது, அவரது மொத்த சொத்தில் மூன்றில் இரண்டு பங்கு இப்போது ஸ்பேஸ் எக்ஸ் நிறுவனத்திலிருந்தே வருகிறது.

மின்சார வாகன உலகின் முடிசூடா மன்னனான டெஸ்லா (Tesla) நிறுவனமும் எலான் மஸ்கின் சொத்து மதிப்பில் முக்கியப் பங்கு வகிக்கிறது. சந்தையில் சில ஏற்ற இறக்கங்கள் இருந்தாலும், டெஸ்லாவில் அவருக்கு 12 சதவீத பங்குகள் உள்ளன. இதன் மதிப்பு சுமார் 178 பில்லியன் டாலராகும். மேலும், பங்கு விருப்பத்தேர்வுகள் (Stock Options) மூலம் அவருக்குக் கிடைக்கும் தொகை 124 பில்லியன் டாலராக உள்ளது. டெஸ்லா பங்குதாரர்கள் அங்கீகரித்த சாதனை ஊதியத் தொகுப்பும் (Pay Package) அவரது சொத்து உயர்வுக்கு ஒரு காரணமாகும்.

ராய்ட்டர்ஸ் மற்றும் கல்ஷி (Kalshi) கணிப்பின்படி, இந்த ஆண்டிலேயே எலான் மஸ்க் உலகின் முதல் டிரில்லியனராக (1000 பில்லியன் டாலர் சொத்து மதிப்பு) மாற 75 சதவீதம் வாய்ப்புள்ளது. 2027-ம் ஆண்டுக்குள் அவர் நிச்சயம் இந்தச் சாதனையை எட்டிவிடுவார் என 72 சதவீத வர்த்தகர்கள் கணிக்கின்றனர். ஸ்பேஸ் எக்ஸ் நிறுவனம் பொதுப் பங்கு வெளியீட்டிற்கு (IPO) வந்தால், எலான் மஸ்கின் சொத்து மதிப்பு 1.5 டிரில்லியன் டாலரைத் தொடும் எனவும் எதிர்பார்க்கப்படுகிறது.

எலான் மஸ்கின் இந்தத் அசுர வளர்ச்சிக்குப் பின்னால் சில சவால்களும் உள்ளன. ஐரோப்பா, ஆசியா மற்றும் கலிபோர்னியா உள்ளிட்ட இடங்களில் xAI நிறுவனத்தின் 'Grok' ஏஐ சாட்பாட் மற்றும் டீப்ஃபேக் (Deepfake) தொடர்பான விசாரணைகளை எதிர்கொண்டு வருகிறது. கட்டுப்பாட்டாளர்களின் (Regulators) கெடுபிடிகள் மற்றும் சந்தை நிலவரங்கள் ஆகியவை மட்டுமே அவரது டிரில்லியனர் கனவுக்குச் சிறியத் தடையாக இருக்க முடியும். ஆனால் தற்போதைய வேகத்தைப் பார்த்தால், எலான் மஸ்க் விரைவில் அந்தச் சிகரத்தைத் தொடுவார் என்றே தெரிகிறது.