அடிச்சு தூக்குது BSNL! இனி சிம் கார்டு இல்லாமல் கால் பேசலாம்! எப்படி தெரியுமா?

இந்திய அரசின் தொலைத்தொடர்பு நிறுவனமான பிஎஸ்என்எல் (BSNL), அதன் வாடிக்கையாளர்களுக்கு ஒரு முக்கியமான மற்றும் நவீன வசதியை அறிமுகப்படுத்தியுள்ளது. தமிழ்நாட்டில் தொடங்கப்பட்டிருக்கும் eSIM சேவை, இனி பிளாஸ்டிக் சிம் கார்டு தேவையில்லை என்பதை உணர்த்துகிறது. இந்தச் சேவை படிப்படியாக நாடு முழுவதும் விரிவுபடுத்தப்பட உள்ளதால், பிஎஸ்என்எல் இனி ஜியோ, ஏர்டெல், விஐ போன்ற தனியார் நிறுவனங்களுக்கு இணையாக முன்னேறி வருகிறது.

eSIM என்பது ‘எம்படட் சிம்’ (embedded SIM) என்பதன் சுருக்கம். அதாவது, சிம் கார்டுக்கான சிப் போனுக்குள்ளேயே பொருத்தப்பட்டிருக்கும். பிஎஸ்என்எல் வழங்கும் இந்த புதிய வசதி மூலம், பயனர்கள் ஒரு பிசிகல் சிம் கார்டு இல்லாமல், தகுந்த டிவைஸ்களில் ஒரு QR கோடை பயன்படுத்தி பிஎஸ்என்எல் சேவைகளைப் பெற முடியும். வாடிக்கையாளரின் அடையாளம் உறுதிப்படுத்தப்படும் KYC நடைமுறைகள் பிஎஸ்என்எல் சேவை மையங்களில் நிறைவு செய்யப்படும்.

பிஎஸ்என்எல்-இன் தலைமை நிர்வாக இயக்குனர் ராபர்ட் ஜே ரவி, "eSIM தொழில்நுட்பம் டிஜிட்டல் இந்தியா திட்டத்திற்கு ஏற்ப, மேம்பட்ட மற்றும் பாதுகாப்பான இணைப்பை வழங்குவதில் பிஎஸ்என்எல்-இன் அர்ப்பணிப்பை காட்டுகிறது" என்று குறிப்பிட்டுள்ளார். இந்த வசதி மூலம், வாடிக்கையாளர்கள் தங்கள் சேவையை எளிதாக ஆக்டிவேட் செய்ய முடியும். மேலும், ஒரே டிவைஸில் இரண்டு எண்கள் பயன்படுத்த முடியும். பாரம்பரிய பிளாஸ்டிக் சிம் கார்டுகளை விட இந்த eSIM மிகவும் பாதுகாப்பானது. புதிய வாடிக்கையாளர்கள் மற்றும் ஏற்கனவே இருக்கும் வாடிக்கையாளர்கள் தங்கள் அருகில் உள்ள பிஎஸ்என்எல் சேவை மையத்திற்கு சென்று, ஐடி ப்ரூஃப் மூலம் எளிதாக eSIM-க்கு மாறிக் கொள்ளலாம்.

eSIM சேவையுடன், பிஎஸ்என்எல் நிறுவனம் நாடு முழுவதும் அதன் பயனர்களுக்கு ஆன்டி-ஸ்பேம் (Anti-spam) மற்றும் ஆன்டி-ஸ்மிஷிங் (Anti-smishing) பாதுகாப்பையும் அறிமுகப்படுத்தியுள்ளது. இந்த புதிய சேவை பயனர்களை, குறுஞ்செய்திகள் மூலம் வரும் மோசடி இணைப்புகளிலிருந்து பாதுகாக்கும். இந்த வசதி, எந்தவொரு தனிப்பட்ட மொபைல் அப்ளிகேஷனும் இல்லாமல், நேரடியாக நெட்வொர்க் பக்கத்திலேயே செயல்படுகிறது. இது நிதி இழப்பு மற்றும் அடையாளத் திருட்டிலிருந்து பயனர்களைக் காப்பாற்ற உதவும்.