நாளை முதல் கத்தரி வெயில் ஆரம்பித்தாலும்! தமிழ்நாடு வெதர்மேன் சொன்ன முக்கிய தகவல்!

தமிழகத்தில் பிப்ரவரி மாதம் தொடக்கத்தில் இருந்தே வெயில் வாட்டி வதைத்து வந்தது. அதுவும் ஏப்ரல் மாதம் முதல் கோடை வெயில் தொடங்கியதை அடுத்து பல்வேறு மாவட்டங்களில் 100 டிகிரி தாண்டி வெயில் சுட்டெரித்து வருகிறது. இதனால் பொதுமக்கள் பகல் நேரங்களில் வீட்டை விட்டு வெளியில் செல்வதை முற்றிலுமாக தவிர்த்து வருகின்றனர். குறிப்பாக கர்ப்பிணி மற்றும் வயதானவர்கள் தேவையில்லாமல் வெளியில் செல்வதை தவிர்க்க வேண்டும் என சுகாதாரத்துறை தரப்பில் அறிவுறுத்தப்பட்டது. இப்பவே வெயில் இப்படியென்றால் கத்திரி வெயிலின் தாக்கம் எப்படி இருக்குமோ என்ற புலம்பி வந்த மக்களுக்கு அதிர்ச்சி செய்தி ஒன்று வெளியாகியுள்ளது. 

அதாவது தமிழ்நாட்டில் ஒவ்வொரு ஆண்டும் மே மாதம் 4-ம் தேதி முதல் 28-ம் தேதி வரை அக்னி நட்சத்திரம் என்று அழைக்கப்படும் கத்திரி வெயில் தொடங்குகிறது. இந்நிலையில் 25 நாட்களுக்கு நீடிக்கும் கத்திரி வெயில் முதல் 7 நாட்கள் வெப்பத்தின் அளவு மெதுவாக அதிகரிக்கத் தொடங்கும். மத்தியில் இருக்கும் 7 நாட்கள் வெப்பத்தின் தாக்கம் கடுமையாக இருக்கும். அடுத்த நாட்களில் வெப்பம் குறையத் தொடங்கும். 

இந்நிலையில், கத்திரி வெயில் நாளை தொடங்கினாலும், ஒரு வாரத்துக்கு வெயிலின் தாக்கம் குறைவாகவே இருக்கும் என பிரதீப் ஜான் தெரிவித்துள்ளார். இதுதொடர்பாக தமிழ்நாடு வெதர்மேன் பிரதீப் ஜான் வெளியிட்டுள்ள எக்ஸ் தளத்தில்: கத்தரி வெயில் நாளை தொடங்கினாலும், மழை காரணமாக அடுத்த ஒரு வாரத்துக்கு வெயிலின் தாக்கம் குறைவாகவே இருக்கும். கடந்த 2024 ஏப்ரல் மாதத்தைப் போலல்லாமல், இந்தாண்டு ஏப்ரல் மாதம் தமிழகத்திற்கு மிகவும் நல்ல மாதமாக இருந்தது. அவ்வப்போது மழை பெய்தது. 

ஆந்திராவுக்கு மிக அருகில் உள்ள வேலூர் பகுதியில் 39-40 டிகிரி செல்சியஸ் வெப்பநிலை தொடர்ந்து இருக்கும். இது இப்பகுதிக்கு இயல்பானது. அங்கும் மழை தொடர்ந்து பெய்யும் என தெரிவித்துள்ளார்.