மும்பையை கதற விட்ட சஞ்சு சாம்சன்.. மிரட்டல் சதம்.. சிஎஸ்கேவுக்காக புதிய சாதனை படைத்த சேட்டன்!

ஐபிஎல்-ன் எல் கிளாசிகோ எனப்படும் போட்டியில், சென்னை சூப்பர் கிங்ஸ் அணியை மீண்டும் ஒருமுறை ஒற்றை ஆளாக தன் தோளில் சுமந்திருக்கிறார் கேரள வீரர் சஞ்சு சாம்சன். மும்பை இந்தியன்ஸுக்கு எதிராக வான்கடே மைதானத்தில் நடந்த இந்த போட்டியில், டாஸ் தோற்று முதலில் பேட்டிங் செய்த சென்னை அணி, சஞ்சு சாம்சனின் அபார சதத்தால் 20 ஓவர்களில் 6 விக்கெட் இழப்புக்கு 207 ரன்கள் குவித்தது. போட்டியின் கடைசிப் பந்தை பவுண்டரிக்கு விரட்டி, சஞ்சு தனது சதத்தை (101*) பூர்த்தி செய்தார். 54 பந்துகளில் 10 பவுண்டரிகள் மற்றும் 6 சிக்ஸர்களுடன், கடைசி வரை ஆட்டமிழக்காமல் இருந்தார்.

கிரிஷ் பகத் வீசிய கடைசி ஓவரில், சஞ்சு சதம் அடிக்க 15 ரன்கள் தேவைப்பட்டது. முதல் பந்தையே சிக்ஸருக்குப் பறக்கவிட்டு 90 ரன்களைக் கடந்தார். அடுத்த இரண்டு பந்துகளில் சிங்கிள் எடுக்கவில்லை. நான்காவது பந்தில் மீண்டும் ஒரு பிரம்மாண்ட சிக்ஸர் அடித்தார். அப்போது அவர் 97 ரன்களில் இருந்தார். 

ஐந்தாவது பந்திலும் சிங்கிள் எடுக்க மறுத்தார்.கடைசிப் பந்தை பவுண்டரிக்கு விரட்டி சதத்தை நிறைவு செய்ததோடு, சென்னை அணிக்கு ஒரு வலுவான ஸ்கோரையும் பெற்றுத் தந்தார். சஞ்சுவுக்கு அடுத்தபடியாக, கேப்டன் ருதுராஜ் கெய்க்வாட் எடுத்த 22 ரன்களே அணியின் இரண்டாவது அதிகபட்ச ஸ்கோராக இருந்தது.

டெவால்ட் பிரெவிஸ் 11 பந்துகளில் 21 ரன்களும், கார்த்திக் ஷர்மா 19 பந்துகளில் 18 ரன்களும், ஜேமி ஓவர்டன் 7 பந்துகளில் 15 ரன்களும் எடுத்தனர். மும்பை தரப்பில், கன்சஃபர் 25 ரன்களுக்கு 2 விக்கெட்டுகளையும், அஷ்வினி குமார் 37 ரன்களுக்கு 2 விக்கெட்டுகளையும் வீழ்த்தினர். ஜஸ்பிரித் பும்ரா 4 ஓவர்களில் 31 ரன்கள் விட்டுக்கொடுத்து ஒரு விக்கெட் எடுத்தார்.

இன்றைய சதம் சஞ்சு சாம்சனின் 5வது ஐபிஎல் சதமாகும். இதன்மூலம், ஐபிஎல்-இல் அதிக சதம் அடித்த வீரர்கள் பட்டியலில் கே.எல். ராகுலுடன் நான்காவது இடத்தை பகிர்ந்து கொள்கிறார். இந்த பட்டியலில் விராட் கோலி (8), ஜோஸ் பட்லர் (7), கிறிஸ் கெய்ல் (6) ஆகியோர் முதல் மூன்று இடங்களில் உள்ளனர். மேலும், ஐபிஎல் வரலாற்றில் மும்பை இந்தியன்ஸ் அணிக்கு எதிராக சதம் அடித்த முதல் சிஎஸ்கே வீரர் என்ற பெருமையையும் சாம்சன் பெற்றுள்ளார்.

2026 ஐபிஎல் தொடரின் ஆரம்பத்தில் சற்றே மந்தமாக ஆடிய சஞ்சு, இப்போது பட்டையைக் கிளப்புகிறார். டெல்லிக்கு எதிராக ஏற்கெனவே ஒரு சதம் அடித்திருந்த நிலையில், தற்போது மும்பை இந்தியன்ஸ் அணிக்கு எதிராக 54 பந்துகளில் 101 ரன்கள் குவித்துள்ளார். இதன்மூலம், ஒரே சீசனில் 2 சதங்கள் அடித்த முதல் சிஎஸ்கே வீரர் என்ற சாதனையை அவர் படைத்துள்ளார்.