Yuzvendra Chahal : ரோட்ல இப்படித்தான் பண்ணுவீங்களா?" - சர்ச்சையில் சிக்கிய யுஸ்வேந்திர சாஹல்? வைரலாகும் வீடியோ!

இந்திய கிரிக்கெட் வீரர் யுஸ்வேந்திர சாஹல் போல தோற்றமளிக்கும் ஒருவர், சொகுசு கார் ஓட்டும்போது சிகரெட் பிடிக்கும் வீடியோ சமூக வலைதளங்களில் வைரலாகி வருகிறது. அந்த வீடியோவில், அவர் சிகரெட்டை புகைத்துவிட்டு அதன் துண்டை சாலையில் வீசுவதும் பதிவாகியுள்ளது. இந்த செயலுக்கு கிரிக்கெட் ரசிகர்கள் கடும் கண்டனம் தெரிவித்து வருகின்றனர். ஆனால், வீடியோவில் இருப்பது உண்மையிலேயே சாஹல்தானா என்பது இன்னும் உறுதியாகவில்லை.

சில வாரங்களுக்கு முன்பு, ஏபி டி வில்லியர்ஸின் யூடியூப் சேனலில் பேசிய சாஹல், தனது கிரிக்கெட் வாழ்க்கையை நீட்டிக்க வாழ்க்கை முறையில் ஒழுக்கத்தை கடைப்பிடிப்பதாகக் கூறியிருந்தார். 'காயங்களைத் தவிர்க்கவும், ஃபிட்னஸை பராமரிக்கவும் கடந்த ஆறு மாதங்களாக மது அருந்துவதை முழுவதுமாக நிறுத்திவிட்டேன். இளம் வீரர்களுக்கு ஒரு முன்மாதிரியாக இருக்க விரும்புகிறேன்' என்று சாஹல் தெரிவித்திருந்தார். இந்நிலையில், இந்த புகைப்பிடிக்கும் வீடியோ வெளியானது அவரது ரசிகர்களுக்கு அதிர்ச்சியை ஏற்படுத்தியுள்ளது.

வீடியோவில் உள்ள நபர், பொது சாலையில் சிகரெட் துண்டை வீசியது நெட்டிசன்களைக் கோபப்படுத்தியுள்ளது. விளையாட்டு வீரர்கள் பொது இடத்தில் இப்படி பொறுப்பில்லாமல் நடந்துகொள்வது எந்த விதத்தில் சரி என்று மக்கள் கேள்வி எழுப்புகின்றனர். 35 வயதான சாஹல், சமீபத்தில்கூட 'அணிக்காக 150% உழைப்பைக் கொடுக்க விரும்புகிறேன்' என்று கூறியிருந்தது குறிப்பிடத்தக்கது.

தற்போது ஐபிஎல் 2026 தொடரில் பஞ்சாப் கிங்ஸ் அணிக்காக விளையாடி வரும் சாஹல், இதுவரை ஆடிய மூன்று போட்டிகளில் மூன்று விக்கெட்டுகளை எடுத்துள்ளார். கடந்த சீசனிலும் 14 போட்டிகளில் 16 விக்கெட்டுகளை வீழ்த்தி அசத்தினார். சன்ரைசர்ஸ் ஹைதராபாத் அணிக்கு எதிரான அடுத்த போட்டிக்கு பஞ்சாப் தயாராகி வரும் நிலையில், இந்த சர்ச்சை சாஹலுக்கு தலைவலியாக மாறியுள்ளது.