ஆசிய கோப்பையில் இந்திய அணி பிளேயிங் லெவன்..! நன்றாக விளையாடியும் இளம் வீரரை தூக்கி வீசிய பிசிசிஐ!

ஆசிய கோப்பை கிரிக்கெட் அடுத்த மாதம் 9ம் தேதி ஐக்கிய அரபு அமீரகத்தில் தொடங்குகிறது. இந்தியா, இலங்கை, பாகிஸ்தான், ஆப்கானிஸ்தான், வங்கதேசம், ஐக்கிய அரபு அமீரகம், ஓமன், ஹாங்காங் ஆகிய 8 அணிகள் இந்த தொடரில் விளையாடுகின்றன. டி20 போட்டி வடிவத்தில் நடைபெறும் இந்த தொடரில் உலகமே ஆவலுடன் எதிர்பார்க்கும் இந்தியா-பாகிஸ்தான் போட்டி செப்டம்பர் 14ம் தேதி நடைபெற உள்ளது.

ஆசியக்கோப்பையில் விளையாடும் 15 பேர் கொண்ட இந்திய அணி ஏற்கெனவே அறிவிக்கப்பட்டுள்ளது. சூர்யகுமார் யாதவ் கேப்டனாக நியமிக்கப்பட்டுள்ளார். சுப்மன் கில் துணை கேப்டனாக நியமனம் செய்யப்பட்டுள்ளார். இந்திய அணியில் அபிஷேக் சர்மா, திலக் வர்மா, ஹர்திக் பாண்டியா, ஷிவம் துபே, அக்சர் படேல், ஜிதேஷ் சர்மா, ஜஸ்பிரித் பும்ரா, வருண் சக்கரவர்த்தி, அர்ஷ்தீப் சிங், குல்தீப் யாதவ், சஞ்சு சாம்சன் ஆகியோர் இடம்பெற்றனர். பிரசித் கிருஷ்ணா, வாஷிங்டன் சுந்தர், ரியான் பராக், துருவ் ஜூரல், யஷஸ்வி ஜெய்ஸ்வால் ஆக்யோர் ரிசர்ச் வீரர்கள் பட்டியலில் உள்ளனர்.

இந்திய அணி பிளேயிங் லெவன் என்ன?

இந்திய அணியின் பிளேயிங் லெவனை பொறுத்தவரை சுப்மன் கில் மற்றும் அபிஷேக் சர்மா தொடக்க வீரர்களாக களமிறங்க உள்ளனர், திலக் வர்மா மற்றும் கேப்டன் சூர்யகுமார் யாதவ் ஆகியோர் மிடில் ஆர்டரில் பேட்டிங் செய்ய உள்ளனர். இதன்பிறகு ஜிதேஷ் சர்மா, ஹர்திக் பாண்ட்யா பின்வரிசையில் அதிரடியாக ஆட ரெடியாக உள்ளனர்.

பவுலிங்கை பொறுத்தவரை ஜஸ்பிரித் பும்ரா, அர்ஷ்தீப் சிங் பிரதான பவுலர்களாக களம் காண்கின்றனர். ஸ்பின் பவுலிங்கில் குல்தீப் யாதவ்க்கு இடம் கிடைக்க அதிக வாய்ப்புள்ளது. சஞ்சு சாம்சன் இந்திய அணியில் இடம்பெற்றிருந்தாலும் பிளேயிங் XI அணியில் அவர் இடம்பெற வாய்ப்பில்லை என்றே தகவல்கள் கூறுகின்றன. கேரள கிரிக்கெட் லீக்கில் 380 ரன்கள் குவித்து சஞ்சு சாம்சன் தனது திறமையை நிரூபித்த போதும் அவருக்கு வாய்ப்புகள் கிடைப்பது கஷ்டம் தான்.

இந்திய டெஸ்ட் கேப்டன் சுப்மன் கில் மீண்டும் களமிறங்குவதால் அபிஷேக் சர்மாவுடன் அவர் தொடக்க வீரராக களமிறங்குவார் என்று கூறப்படுகிறது. இதனால் சஞ்சு சாம்சனின் இடம் பறிபோகியுள்ளது. ஜிதேஷ் சர்மாவும் விக்கெட் கீப்பராக இருப்பதால் அதிரடியாக விளையாடுவதால் சஞ்சுவுக்கு வாய்ப்பு கிடைப்பதில் சிக்கல் தான். இதேபோல் சிஎஸ்கே வீரர் ஷிபம் துபேவுக்கு பிளேயிங் லெவனில் இடம் கிடைக்க வாய்ப்பில்லை. 

ஆசியக் கோப்பையில் இந்திய அணி உத்தேச பிளேயிங் லெவன்: சூர்யகுமார் யாதவ் (கேப்டன்), சுப்மன் கில் ( துணை கேப்டன்), அபிஷேக் சர்மா, திலக் வர்மா, ஹர்திக் பாண்ட்யா, ஜிதேஷ் சர்மா (விக்கெட் கீப்பர்), அக்சர் படேல், ஜஸ்பிரித் பும்ரா, அர்ஷ்தீப் சிங், குல்தீப் யாதவ், வருண் சக்ரவர்த்தி அல்லது ஹர்ஷித் ராணா.