இன்ஸ்டா ரீல் போட்டு மாட்டிக்கிட்ட புருஷன்! அடுத்து மனைவி செய்த சம்பவம்...!

உத்தரப் பிரதேச மாநிலம், ஹர்தோய் மாவட்டத்தில் எட்டு வருடங்களாகக் காணாமல் போனதாகக் கருதப்பட்ட ஒருவர், இன்ஸ்டாகிராம் ரீல் மூலம் தனது முதல் மனைவியால் கண்டறியப்பட்டு, கைது செய்யப்பட்டார். மனைவியை கைவிட்டுவிட்டு, வேறு திருமணம் செய்துகொண்டதால் அவர் மீது வழக்குப் பதிவு செய்யப்பட்டுள்ளது.

ஹர்தோய் மாவட்டம், சந்திலா பகுதியைச் சேர்ந்த ஷீலு (Sheelu) என்பவரின் கணவர் ஜிதேந்திரா என்கிற பப்லு (Jitendra alias Bablu) 2018-ம் ஆண்டு, ஷீலு கர்ப்பமாக இருந்தபோது அவரை விட்டுவிட்டுச் சென்றுவிட்டார். பின்னர், அவர் பஞ்சாபில் உள்ள லூதியானாவில் இரண்டாவது திருமணம் செய்து கொண்டு வாழ்ந்து வந்துள்ளார்.

சமீபத்தில், ஷீலு தனது இன்ஸ்டாகிராமில் ஒரு ரீல் வீடியோவைப் பார்த்தபோது, அதில் தனது கணவர் ஜிதேந்திரா இருப்பதைக் கண்டார். உடனடியாக அவர் காவல்துறைக்குத் தகவல் அளித்தார். காவல்துறையினர் நடத்திய விசாரணையில், வீடியோவில் இருப்பது ஜிதேந்திரா தான் என்றும், அவர் லூதியானாவில் இருப்பதாகவும் உறுதி செய்யப்பட்டது.

ஜிதேந்திராவின் தந்தை, 2018-ம் ஆண்டு ஜிதேந்திராவைக் காணவில்லை என்று புகார் அளித்திருந்தார். அப்போது, ஷீலுவின் உறவினர்கள் மீது சந்தேகம் இருப்பதாக அவர் குறிப்பிட்டிருந்தார்.

துணை ஆய்வாளர் ரஜினிகாந்த் பாண்டே தலைமையிலான காவல்துறைக் குழுவினர் லூதியானா சென்று ஜிதேந்திராவைக் கைது செய்தனர். ஷீலு அளித்த புகாரின் அடிப்படையில் அவர் மீது வழக்கு பதிவு செய்யப்பட்டுள்ளது.

"கைது செய்யப்பட்ட ஜிதேந்திராவிடம் விசாரணை நடைபெற்று வருகிறது. மேலும் சட்டரீதியான நடவடிக்கைகள் மேற்கொள்ளப்பட்டு வருகின்றன" என்று வட்டார அதிகாரி சந்தோஷ் குமார் சிங் தெரிவித்துள்ளார்.