கூட்டணியை குஷி படுத்தும் பாஜக! துணை ஜனாதிபதி தேர்தலில் முதல் ஓட்டு போட ரெடியான மோடி!

இந்திய துணை குடியரசுத் தலைவர் தேர்தல் நாளை செவ்வாய்க்கிழமை நடைபெறவுள்ளது. இந்தத் தேர்தலில் வாக்களிக்கும் முதல் நபராகப் பிரதமர் நரேந்திர மோடி இருப்பார் எனத் தகவல் வெளியாகியுள்ளது.

பஞ்சாப் மற்றும் ஹரியானா மாநிலங்களின் நாடாளுமன்ற உறுப்பினர்களுடன் இணைந்து பிரதமர் மோடி தனது வாக்கைச் செலுத்த உள்ளார். மத்திய அமைச்சர்களான கிரண் ரிஜிஜு, ராம் மோகன் நாயுடு மற்றும் சிவசேனா எம்பி ஸ்ரீகாந்த் ஷிண்டே ஆகியோர் துணை குடியரசுத் தலைவர் தேர்தலுக்கான தேர்தல் முகவர்களாக நியமிக்கப்பட்டுள்ளனர்.

இந்திய அரசியலமைப்பின் 66(1) பிரிவின்படி, துணை குடியரசுத் தலைவர் தேர்தல் விகிதாசாரப் பிரதிநிதித்துவ முறையின்படி ரகசிய வாக்கெடுப்பு மூலம் நடத்தப்படும்.

முன்னதாக, ஜூலை 21 அன்று, துணை குடியரசுத் தலைவராக இருந்த ஜகதீப் தன்கர் உடல்நலக் குறைவு காரணமாக தனது பதவியை ராஜினாமா செய்தார். இதனால் ஏற்பட்ட காலி இடத்திற்குத் தேர்தல் நடத்தப்படுகிறது.

துணை குடியரசுத் தலைவர் பதவிக்கான தேர்தல் நாளை (செப்டம்பர் 9) நடைபெறும்.

இந்தத் தேர்தலில், தேசிய ஜனநாயகக் கூட்டணியின் (NDA) வேட்பாளராக சி.பி. ராதாகிருஷ்ணன் மற்றும் இந்தியா கூட்டணியின் வேட்பாளராக ஓய்வுபெற்ற உச்ச நீதிமன்ற நீதிபதி பி. சுதர்சன் ரெட்டி ஆகியோர் களத்தில் உள்ளனர்.

துணை குடியரசுத் தலைவர், நாடாளுமன்றத்தின் இரு அவைகளிலும் உள்ள உறுப்பினர்களைக் கொண்ட வாக்காளர் குழுவால் தேர்ந்தெடுக்கப்படுகிறார்.

தேர்தலுக்கு முன்னதாக, செப்டம்பர் 8 அன்று, தேசிய ஜனநாயகக் கூட்டணியின் நாடாளுமன்ற உறுப்பினர்களுக்குப் பிரதமர் நரேந்திர மோடி இரவு விருந்து அளிக்கிறார்.

"துணை குடியரசுத் தலைவர் தேர்தலின் முந்தைய நாள் பிரதமர் மோடி என்.டி.ஏ. எம்.பி.க்களுக்கு இரவு விருந்து அளிக்கிறார். இது எப்போதும் கூட்டணியில் ஒற்றுமையை வலுப்படுத்தும்" என்று மூத்த தலைவர் ஒருவர் தெரிவித்திருக்கிறார்.

"எங்கள் வேட்பாளரான சி.பி. ராதாகிருஷ்ணனுக்கு அனைத்து என்.டி.ஏ. கூட்டணிக் கட்சிகளின் முழு ஆதரவும் உள்ளது" என்றும் அவர் கூறினார்.