முடிவுக்கு வந்த நீண்ட நாள் ரகசியம்... விஜய் தேவரகொண்டா - ராஷ்மிகா திருமண தேதி லீக்!

தென்னிந்திய திரையுலகமே ஆவலுடன் எதிர்பார்த்துக் கொண்டிருந்த ஒரு காதல் கதை, இப்போது திருமண பந்தத்தில் இணையப் போகிறது. 'கீதா கோவிந்தம்' படத்தில் தொடங்கிய இவர்களின் கெமிஸ்ட்ரி, திரையைத் தாண்டி நிஜ வாழ்க்கையிலும் மலர்ந்துள்ள செய்தி இப்போது வைரலாகி வருகிறது. பல ஆண்டுகளாகத் தங்கள் காதலை மறைமுகமாகப் பேணி வந்த விஜய் தேவரகொண்டா - ராஷ்மிகா மந்தனா ஜோடியின் திருமணத் தேதி குறித்த ரகசியம் தற்போது கசிந்துள்ளது.

சமூக வலைதளங்களில் தீயாய் பரவி வரும் தகவல்களின்படி, இவர்களது திருமணம் வரும் பிப்ரவரி 26, 2026 அன்று நடைபெற உள்ளது. இதற்காக ராஜஸ்தான் மாநிலம், உதய்ப்பூர் அரண்மனையில் பிரம்மாண்ட ஏற்பாடுகள் செய்யப்பட்டு வருவதாகக் கூறப்படுகிறது. பாலிவுட் பாணியில் மிக நெருக்கமான நண்பர்கள் மற்றும் உறவினர்கள் முன்னிலையில் இந்த ரகசியத் திருமணம் நடைபெற வாய்ப்புள்ளதாகத் தெரிகிறது.

திருமணம் ராஜஸ்தானில் நடந்தாலும், தென்னிந்தியத் திரையுலகப் பிரபலங்களுக்காக ஹைதராபாத்தில் ஒரு பிரம்மாண்ட வரவேற்பு நிகழ்ச்சிக்குத் திட்டமிடப்பட்டுள்ளது. வைரலாகி வரும் அழைப்பிதழின்படி, மார்ச் 4, 2026 அன்று ஹைதராபாத்தில் உள்ள நட்சத்திர ஹோட்டலில் இந்த நிகழ்வு நடைபெறும் எனத் தெரிகிறது.கடந்த அக்டோபர் மாதமே இவர்களுக்கு ரகசியமாக நிச்சயதார்த்தம் முடிந்ததாகச் செய்திகள் வெளியான நிலையில், தற்போது இந்த திருமணத் தகவல் ரசிகர்களை உற்சாகத்தில் ஆழ்த்தியுள்ளது.

இதுவரை விஜய் தேவரகொண்டா அல்லது ராஷ்மிகா தரப்பிலிருந்து அதிகாரப்பூர்வமாக எந்த உறுதிப்படுத்தலும் வரவில்லை. இருப்பினும், சமீபகாலமாகப் பொது நிகழ்ச்சிகளில் இவர்கள் இருவரும் ஜோடியாகத் தென்படுவதும், ராஷ்மிகாவிடம் திருமணத்தைப் பற்றிக் கேட்கும்போது அவர் காட்டும் வெட்கப் புன்னகையும் இந்தச் செய்தியை உறுதிப்படுத்தும் விதமாகவே உள்ளன. 'ரௌடி' ஹீரோவும், 'நேஷனல் கிரஷ்' ராஷ்மிகாவும் மணமேடை ஏறுவதைக் காண ரசிகர்கள் இப்போதே சமூக வலைதளங்களில் வாழ்த்துகளைக் குவிக்கத் தொடங்கிவிட்டனர்.