தமிழ்நாட்டில் பாக்ஸ் ஆபிஸ் கிங் யார்? 2025-ல் அதிக வசூல் அள்ளிய டாப் 10 தமிழ் படங்கள் லிஸ்ட் இதோ

2025-ம் ஆண்டு தமிழ் சினிமாவுக்கு ஏற்ற இறக்கம் நிறைந்த ஆண்டாகவே அமைந்திருக்கிறது. இந்த ஆண்டு வெற்றிபெற்ற படங்களைக் காட்டிலும் தோல்வி அடைந்த படங்களின் எண்ணிக்கை தான் அதிகம். இதுவரை கிட்டத்தட்ட 200 படங்கள் ரிலீஸ் ஆகி இருக்கும். அதில் 20 படங்கள் கூட வெற்றிவாகை சூடி இருக்காது. இந்த நிலையில், தமிழ்நாடு பாக்ஸ் ஆபிஸில் அதிக வசூல் அள்ளிய டாப் 10 தமிழ் படங்களின் பட்டியல் வெளியாகி உள்ளது.

மணிரத்னம் இயக்கத்தில் கமல்ஹாசன், சிம்பு, திரிஷா, அபிராமி, நாசர், அசோக் செல்வன், ஐஸ்வர்யா லெட்சுமி என மிகப்பெரிய நட்சத்திர பட்டாளமே நடித்த படம் தக் லைஃப், மிகப்பெரிய எதிர்பார்ப்புக்கு மத்தியில் வெளியாகி தோல்வியடைந்த இப்படம் தமிழ்நாடு பாக்ஸ் ஆபிஸில் ரூ.44 கோடி வசூலித்து 10ம் இடத்தில் உள்ளது,

தமிழ் நாடு பாக்ஸ் ஆபிஸில் அதிக வசூல் அள்ளிய படங்கள் பட்டியலில் சூர்யாவின் ரெட்ரோ 9-வது இடத்தில் உள்ளது. கார்த்திக் சுப்புராஜ் இயக்கிய இப்படத்தில் சூர்யாவுக்கு ஜோடியாக பூஜா ஹெக்டே நடித்துள்ளார். இப்படம் தமிழ்நாட்டில் 51 கோடி வசூலித்தது.

சுந்தர் சி இயக்கத்தில் விஷால் நடித்து இந்த ஆண்டு பொங்கல் விருந்தாக திரைக்கு வந்த படம் மதகஜராஜா. விஜய் ஆண்டனி இசையமைத்த இப்படத்தில் அஞ்சலி, வரலட்சுமி ஆகியோர் ஹீரோயின்களாக நடித்திருந்தனர். இப்படம் தமிழ்நாட்டில் ரூ.52 கோடி வசூலித்து 8ம் இடத்தில் உள்ளது.

சிவகார்த்திகேயன் நடிப்பில் இம்மாதம் திரைக்கு வந்த படம் மதராஸி. ஏ.ஆர்.முருகதாஸ் இயக்கிய இப்படத்தில் எஸ்.கே.வுக்கு ஜோடியாக ருக்மிணி வசந்த் நடித்திருந்தார். இப்படம் தமிழ்நாடு பாக்ஸ் ஆபிஸில் ரூ.56 கோடி வசூலித்து 7ம் இடத்தை பிடித்துள்ளது.

சத்ய ஜோதி பிலிம்ஸ் நிறுவனம் தயாரிப்பில் மக்கள் செல்வன் விஜய் சேதுபதி ஹீரோவாக நடித்து கடந்த ஜூலை மாதம் திரைக்கு வந்த படம் தலைவன் தலைவி. இப்படத்தை பாண்டிராஜ் இயக்கி இருந்தார். இப்படம் தமிழ்நாட்டில் மட்டும் ரூ.59 கோடி வசூலை வாரிக்குவித்து 6ம் இடத்தில் உள்ளது.

சசிகுமார் கதையின் நாயகனாக நடித்த படம் டூரிஸ்ட் ஃபேமிலி. அபிஷன் ஜீவிந்த் என்கிற புதுமுக இயக்குனர் இயக்கிய இப்படத்தில் சிம்ரன், கமலேஷ், எம்.எஸ்.பாஸ்கர் ஆகியோர் முக்கிய கதாபாத்திரத்தில் நடித்திருந்தனர். இப்படம் தமிழ்நாடு பாக்ஸ் ஆபிஸில் ரூ.63 கோடி வசூலித்து 5ம் இடத்தில் உள்ளது.

அஸ்வத் மாரிமுத்து இயக்கத்தில் பிரதீப் ரங்கநாதன், அனுபமா பரமேஸ்வரன், கயாடு லோகர், விஜே சித்து, ஹர்ஷத் கான் என மிகப்பெரிய நட்சத்திர பட்டாளமே நடித்து கடந்த பிப்ரவரி மாதம் ரிலீஸ் ஆன படம் டிராகன். ஏஜிஎஸ் நிறுவனம் தயாரித்த இப்படம் தமிழ்நாட்டில் ரூ.78 கோடி வசூலித்து 4ம் இடத்தை பிடித்துள்ளது.

இந்த பட்டியலில் இரண்டு அஜித் படங்கள் இடம்பெற்று உள்ளன. அதில் ஒன்று தான் விடாமுயற்சி. மகிழ் திருமேனி இயக்கிய இப்படத்தில் அஜித்துக்கு ஜோடியாக திரிஷா நடித்திருந்தார். இப்படத்தை லைகா நிறுவனம் தயாரித்து இருந்தது. இப்படம் தமிழ்நாடு பாக்ஸ் ஆபிஸில் ரூ.79 கோடி வசூலித்து 3ம் இடத்தில் உள்ளது.

சூப்பர்ஸ்டார் ரஜினிகாந்த் நடிப்பில் மிகப்பெரிய எதிர்பார்ப்புடன் கடந்த ஆகஸ்ட் மாதம் திரைக்கு வந்த படம் கூலி. லோகேஷ் கனகராஜ் இயக்கிய இப்படத்தை சன் பிக்சர்ஸ் நிறுவனம் தயாரித்து இருந்தது. அனிருத் இப்படத்திற்கு இசையமைத்து இருந்தார். இப்படம் தமிழ்நாட்டில் 147.20 கோடி வசூலித்து 2ம் இடத்தில் உள்ளது.

தமிழ்நாடு பாக்ஸ் ஆபிஸில் இந்த ஆண்டு அதிக வசூல் அள்ளிய படம் என்கிற சாதனையை அஜித்தின் குட் பேட் அக்லி திரைப்படம் படைத்துள்ளது. ஆதிக் ரவிச்சந்திரன் இயக்கத்தில் கடந்த ஏப்ரல் மாதம் திரைக்கு வந்த இப்படத்தை மைத்ரீ மூவி மேக்கர்ஸ் நிறுவனம் தயாரித்து இருந்தது. இப்படம் தமிழ்நாட்டில் மட்டும் ரூ. 152.20 கோடி வசூலித்து கெத்தாக முதலிடத்தை பிடித்துள்ளது.