இனி காலேஜ் வைஃபை 'ஜெட்' வேகத்தில் இருக்கும்! மாணவர்களுக்கு ஒரு ஹேப்பி நியூஸ்.

இந்தியாவில் உள்ள பல்கலைக்கழகங்கள் மற்றும் கல்லூரிகளில் டிஜிட்டல் உள்கட்டமைப்பை மேம்படுத்த பல்கலைக்கழக மானியக் குழு (UGC) ஒரு முக்கிய நடவடிக்கையை எடுத்துள்ளது. இந்தியத் தொலைத்தொடர்பு ஒழுங்குமுறை ஆணையம் (TRAI) அறிமுகப்படுத்திய புதிய "டிஜிட்டல் கனெக்டிவிட்டி ரேட்டிங்" (Digital Connectivity Rating) முறையைப் பற்றி அனைத்து உயர்கல்வி நிறுவனங்களுக்கும் யுஜிசி தகவல் அனுப்பியுள்ளது. இது மாணவர்களுக்குக் கல்லூரி வளாகத்தில் தடையற்ற இணைய வசதியை உறுதி செய்வதற்கான ஒரு முயற்சியாகும்.

டிராய் (TRAI) அறிமுகப்படுத்தியுள்ள இந்தத் திட்டத்தின்படி, கட்டிடங்கள் மற்றும் வளாகங்கள் அவற்றின் இணைய இணைப்புத் தரத்தின் அடிப்படையில் மதிப்பிடப்படும். அக்டோபர் 2024 முதல் அமலுக்கு வந்த இந்த விதிமுறையின் கீழ், 'டிஜிட்டல் கனெக்டிவிட்டி ரேட்டிங் ஏஜென்சிகள்' (DCRAs) மூலம் கல்வி நிறுவனங்களின் கட்டிடங்கள் ஆய்வு செய்யப்படும். அந்த வளாகத்தில் இணைய வேகம் எப்படி உள்ளது, 5ஜி வசதி உள்ளதா, மற்றும் நெட்வொர்க் கவரேஜ் சிறப்பாக உள்ளதா என்பதைப் பொறுத்து அந்த இடத்திற்கு 'ஸ்டார் ரேட்டிங்' வழங்கப்படும்.

இன்றைய நவீன உலகில் கல்வி என்பது வகுப்பறையோடு முடிந்துவிடுவதில்லை. ஆன்லைன் வகுப்புகள், டிஜிட்டல் நூலகங்கள் மற்றும் ஆராய்ச்சிப் பணிகளுக்கு வேகமான இணையம் மிக அவசியம். எனவே, கல்லூரிகளில் சிறந்த டிஜிட்டல் உள்கட்டமைப்பை உருவாக்குவது காலத்தின் கட்டாயமாகிவிட்டது. இந்த ரேட்டிங் முறையை அமல்படுத்துவதன் மூலம், கல்லூரிகள் தங்களை "டிஜிட்டல் ரெடி" (Digitally Ready) வளாகங்களாக மாற்றிக்கொள்ள முடியும் என்று டிராய் கூறியுள்ளது.

கல்லூரிகள் இந்த ரேட்டிங் முறையைப் பின்பற்றுவதன் மூலம், எந்தக் கல்லூரியில் சிறந்த இணைய வசதி உள்ளது என்பதை மாணவர்களும் பெற்றோர்களும் எளிதாகத் தெரிந்துகொள்ள முடியும். இது கல்லூரிகளுக்கு இடையே ஆரோக்கியமான போட்டிய உருவாக்கி, உள்கட்டமைப்பை மேம்படுத்த வழிவகுக்கும். யுஜிசி தனது சுற்றறிக்கையில், அங்கீகாரம் (Accreditation) மற்றும் தர மேம்பாட்டு முயற்சிகளின் ஒரு பகுதியாக இந்த ரேட்டிங் முறையைப் பயன்படுத்துமாறு பல்கலைக்கழகங்களைக் கேட்டுக்கொண்டுள்ளது.

விருப்பமுள்ள பல்கலைக்கழகங்கள் டிராய் இணையதளத்தில் பட்டியலிடப்பட்டுள்ள அங்கீகரிக்கப்பட்ட ஏஜென்சிகளைத் தொடர்பு கொண்டு தங்கள் வளாகத்தை மதிப்பீடு செய்யலாம். இதன் மூலம் எதிர்காலத்தில் அனைத்துக் கல்லூரி வளாகங்களிலும் அதிவேக இணைய வசதி கிடைப்பது உறுதி செய்யப்படும் என எதிர்பார்க்கப்படுகிறது.