சம்பளம் பத்தலையா? பாஸ் கிட்ட கேட்க பயமா? கவலையை விடுங்க.. உங்களுக்காக வாதாட வந்தாச்சு AI!

 பலருக்குத் தங்களின் திறமைக்கு ஏற்ற சம்பளத்தைக் கேட்கவே தயக்கம் இருக்கும். "கேட்டால் வேலை போய்விடுமோ?" அல்லது "எப்படி ஆரம்பிப்பது?" என்ற குழப்பம் இருக்கும். ஆனால், இப்போது அந்த கவலையைப் போக்க AI வந்துவிட்டது. இந்த புதிய AI கருவிகள், ஒரு மனிதனைப் போலவே உங்களுடன் உரையாடி, சம்பள பேச்சுவார்த்தைக்கு உங்களைத் தயார்படுத்துகின்றன. உங்கள் தயக்கத்தை உடைத்து, தைரியமாகப் பேச இதுவே முதல் படி.

நீங்கள் கேட்கும் சம்பளம் சரியானதா என்பதை எப்படி அறிவது? இந்த AI மென்பொருட்கள், உங்கள் வேலை, அனுபவம் மற்றும் நீங்கள் வசிக்கும் இடம் ஆகியவற்றை அடிப்படையாகக் கொண்டு சந்தையில் தற்போது வழங்கப்படும் சரியான சம்பள விவரங்களை (Market Standards) நொடியில் எடுத்துத் தருகின்றன. "இதே வேலைக்கு மற்ற நிறுவனங்களில் இவ்வளவு தருகிறார்கள்" என்று நீங்கள் ஆதாரத்தோடு பேச இந்தத் தரவுகள் உதவும்.

நேர்முகத் தேர்வின் போதோ அல்லது அப்ரைசல் (Appraisal) நேரத்திலோ உங்கள் மேலாளர் என்ன கேள்விகள் கேட்பார் என்று கணிக்க முடியாது. ஆனால், இந்த AI பாட் (Bot) ஒரு HR மேலாளரைப் போலவே உங்களுடன் ஒத்திகை பார்க்கும். நீங்கள் கேட்கும் கேள்விகளுக்கு அது பதில் அளிக்கும், அது கேட்கும் கேள்விகளுக்கு நீங்கள் பதில் அளிக்க வேண்டும். உங்கள் பதிலில் உள்ள குறைபாடுகளைச் சுட்டிக்காட்டி, எப்படிப் பேசினால் வெற்றி பெறலாம் என்று பயிற்சியளிக்கும்.

"எனக்கு சம்பள உயர்வு வேண்டும்" என்று நேரடியாகக் கேட்பதற்கும், "நிறுவனத்தின் வளர்ச்சிக்கு நான் ஆற்றிய பங்குகளுக்காக, எனது ஊதியத்தை மறுபரிசீலனை செய்ய முடியுமா?" என்று கேட்பதற்கும் நிறைய வித்தியாசம் உள்ளது. இந்த AI, உங்கள் கோரிக்கையை மிகவும் professional ஆகவும், அதே சமயம் உறுதியாகவும் வெளிப்படுத்தத் தேவையான சரியான வார்த்தைகளை (Scripts) மின்னஞ்சலாகவோ அல்லது பேச்சு வழக்காகவோ எழுதிக் கொடுக்கும்.

 சில நேரங்களில் நிறுவனத்தால் நீங்கள் கேட்கும் சம்பளத்தைத் தர முடியாமல் போகலாம். அந்த சமயங்களில், சம்பளத்திற்குப் பதிலாக வேறு என்ன சலுகைகளைக் (Perks) கேட்கலாம் என்பதையும் AI பரிந்துரைக்கும். கூடுதல் விடுமுறை நாட்கள், வீட்டில் இருந்தே வேலை செய்யும் வசதி (Work from home), அல்லது கல்விக்கான உதவித்தொகை போன்ற மாற்று வழிகளை யோசித்து, உங்களுக்குச் சாதகமான முடிவை எட்ட இது உதவும்.