JEE Main 2026: சும்மா படிச்சா மட்டும் போதாது! இந்த 'டெக்னிக்' தெரிஞ்சா தான் வெற்றி!

JEE Main 2026 தேர்வுக்குத் தயாராகும் மாணவர்களா நீங்கள்? வெற்றியைத் தீர்மானிக்கும் மிக முக்கிய ஆயுதமான 'மாதிரித் தேர்வுகளை' எப்படிப் பயன்படுத்த வேண்டும் என்று விளக்குகிறது இக்கட்டுரை.

JEE Main 2026 தேர்வுக்கான நாள் நெருங்கிக் கொண்டிருக்கிறது. இந்த நேரத்தில் மாணவர்கள் சிலபஸை முடிப்பது, ரிவிஷன் செய்வது, கோச்சிங் வகுப்புகள் என கடும் அழுத்தத்தில் இருப்பார்கள். தேர்வில் வெற்றி பெற வெறும் படிப்பு மட்டும் போதாது; படித்ததை சரியான முறையில் செயல்படுத்திப் பார்க்கும் திறன் அவசியம். இதற்கு கைகொடுப்பதுதான் 'மாதிரித் தேர்வுகள்' (Mock Tests). ஆனால், சும்மா ஏதோ ஒரு தேர்வை எழுதுவது பலனளிக்காது. அதை ஒரு தவம் போல அணுக வேண்டும். அது எப்படி? இதோ விவரம்.

தேர்வுகளை எழுதத் தொடங்கும் முன், நீங்கள் சரியான தேர்வைத் தான் தேர்ந்தெடுக்கிறீர்களா என்பதை உறுதி செய்யுங்கள். ஆன்லைனில் கிடைக்கும் எல்லா தேர்வுகளும் தரமானவை அல்ல. தவறான தேர்வுகளை எழுதினால் தேவையற்ற பயம் அல்லது அதீத நம்பிக்கை வந்துவிடும்.

• தற்போதைய JEE Main தேர்வு முறைப்படி (Exam Pattern) வினாத்தாள் உள்ளதா?

• கேள்விகளின் கடினத்தன்மை (Difficulty Level) சரியாக உள்ளதா?

என்பதை கவனிக்க வேண்டும். 'NTA Abhyas App' மற்றும் கடந்த ஆண்டுகளின் வினாத்தாள்கள் (Previous Year Papers) மிகச்சிறந்த தேர்வுகள். இவை உண்மையான தேர்வு எப்படி இருக்கும் என்பதைத் துல்லியமாக உணர்த்தும்.

தயாரிப்பின் ஆரம்ப நிலையில் வாரத்திற்கு ஒரு மாதிரித் தேர்வு எழுதுவது போதுமானது. இது பாடங்களை ஆழமாகப் புரிந்து கொள்ள உதவும். ஆனால் தேர்வு நெருங்கும் கடைசி சில மாதங்களில், வாரத்திற்கு 3 முதல் 4 தேர்வுகள் எழுதுவது அவசியம். இது உங்கள் தேர்வு எழுதும் வேகத்தையும், 3 மணி நேரம் சோர்ந்து போகாமல் இருக்கும் மன உறுதியையும் (Stamina) வளர்க்கும்.

வீட்டில் தேர்வு எழுதினாலும், அதை உண்மையான தேர்வு கூடத்தில் எழுதுவது போலவே பாவிக்க வேண்டும்.

• அமைதியான அறையில் அமருங்கள்.

• டைமரை (Timer) இடையில் நிறுத்தவே கூடாது.

• நோட்ஸ் அல்லது பார்முலா புத்தகங்களைப் பார்க்காதீர்கள்.

• இடைவேளை (Break) எடுக்காதீர்கள்.

இப்படிப் பழகினால் தான், உண்மையான தேர்வின் போது ஏற்படும் பதற்றம் (Exam Anxiety) குறையும்.

ஒவ்வொரு மாணவருக்கும் ஒரு தனித்தன்மை உண்டு. மாதிரித் தேர்வின் போது வெவ்வேறு உத்திகளைக் கையாண்டு பாருங்கள்:

• சிலர் தங்களுக்குப் பிடித்த பாடத்தில் (உதாரணமாக Physics) இருந்து தொடங்குவார்கள்.

• சிலர் Chemistry-யை முதலில் முடித்துவிட்டு மற்ற பாடங்களுக்குச் செல்வார்கள்.

• சிலர் முதலில் எளிமையான கேள்விகளை மட்டும் தேர்வு செய்து முடிப்பார்கள்.

எது உங்களுக்கு அதிக மதிப்பெண்களைப் பெற்றுத் தருகிறது என்பதை மாதிரித் தேர்வுகளில் சோதித்துப் பாருங்கள். கடினமான கேள்விகளை 'ஸ்கிப்' (Skip) செய்துவிட்டு, பின்னர் வந்து கவனிக்கும் பழக்கத்தை வளர்த்துக் கொள்ளுங்கள்.

JEE Main தேர்வில் வெற்றி பெற அறிவு மட்டும் போதாது, வேகமும் வேண்டும். பல மாணவர்கள் விடை தெரிந்தும், நேரம் போதாமல் மதிப்பெண்களை இழக்கிறார்கள். ஒரு கேள்விக்கு எவ்வளவு நேரம் செலவிடலாம், எப்போது அதை விட்டுவிட்டு அடுத்த கேள்விக்குச் செல்ல வேண்டும் என்பதை மாதிரித் தேர்வுகள் மூலம் கற்றுக் கொள்ளுங்கள். வேகம் மற்றும் துல்லியம் (Accuracy) ஆகிய இரண்டையும் சமன் செய்ய இதுவே சிறந்த வழி.

பகுப்பாய்வு மிக முக்கியம்

தேர்வு எழுதுவதை விட முக்கியமானது, அதைத் திருத்திப் பார்ப்பது. தேர்வு முடிந்ததும் 2 முதல் 3 மணி நேரம் ஒதுக்கி வினாத்தாளை அலசுங்கள்.

• ஏன் தவறு நடந்தது? (Conceptual error?)

• கவனக்குறைவால் தவறு நடந்ததா? (Careless mistake?)

• நேரம் போதவில்லையா?

இவற்றை ஒரு நோட்டில் குறித்து வையுங்கள். சுமார் 25 முழுமையான மாதிரித் தேர்வுகளை எழுதி, அவற்றைச் சரியாக அலசினால், உங்கள் மதிப்பெண்ணிலும், தன்னம்பிக்கையிலும் பெரிய மாற்றத்தை உணர்வீர்கள்.