மாதம் ரூ.4 ஆயிரம் உதவித்தொகையுடன் UPSC , TNPSC படிக்க இலவச பயிற்சி : தகுதி என்ன? விண்ணப்பிப்பது எப்படி?

இந்தியக் குடியரசின் சிற்பி டாக்டர் பி.ஆர். அம்பேத்கர் அவர்களின் பெயரில் மத்திய தமிழ்நாடு பல்கலைக்கழகத்தில் நிறுவப்பட்டுள்ள டாக்டர் அம்பேத்கர் சிறப்பு மையம் (DACE), சமூகத்தின் பின்தங்கிய பிரிவினரின் கல்வி மற்றும் பொருளாதார மேம்பாட்டிற்காக அரும்பணிகளை ஆற்றி வருகிறது. 

"பட்டியலிடப்படாத, நாடோடி மற்றும் அரை நாடோடி பழங்குடியினர் சமூகத்தின் பொருளாதார மேம்பாட்டிற்கான திட்டம் (SEED)" எனும் சிறப்புத் திட்டத்தின் கீழ், மத்திய மற்றும் மாநில அரசுப் பணிகளுக்கான நுழைவுத் தேர்வுகளான UPSC மற்றும் TNPSC தேர்வுகளுக்கு இலவசப் பயிற்சி அளிக்கப்படவுள்ளது. இது சமூக நீதி மற்றும் சமத்துவத்தை நோக்கிய ஒரு குறிப்பிடத்தக்க முன்னேற்றமாகும்.

இந்த இலவசப் பயிற்சித் திட்டத்தில் சேர சில தகுதிகள் நிர்ணயிக்கப்பட்டுள்ளன. சீர்மரபினர், நாடோடி மற்றும் அரை நாடோடி சமூகங்களைச் (DNT'S, NT, SNT COMMUNITY) சேர்ந்த தகுதியுள்ள மாணவர்கள் இந்த வாய்ப்பைப் பயன்படுத்திக் கொள்ளலாம். 

விண்ணப்பதாரர்களின் குடும்ப ஆண்டு வருமானம் ரூ. 8 லட்சத்திற்கும் குறைவாக இருக்க வேண்டும். மேலும், 12 ஆம் வகுப்பு மற்றும் இளங்கலைப் பட்டப்படிப்பில் 50% மேல் மதிப்பெண்கள் பெற்றிருக்க வேண்டும். மொத்த இடங்களில் 30% பெண்களுக்கு ஒதுக்கீடு செய்யப்பட்டுள்ளது, இது பெண் கல்விக்கு முக்கியத்துவம் அளிக்கிறது.

இப்பயிற்சியில் சேரும் மாணவர்களுக்கு ஒரு சிறந்த ஊக்கத்தொகையும் வழங்கப்படுகிறது. வெளி மாவட்ட மாணவர்களுக்கு மாதம் ரூ. 4000/- மற்றும் உள்ளூர் மாணவர்களுக்கு மாதம் ரூ. 1500/- உதவித்தொகையாக வழங்கப்படும். இந்த உதவித்தொகை, மாணவர்கள் தங்கள் பயிற்சியில் முழு கவனம் செலுத்தவும், பொருளாதாரச் சுமையின்றி கல்வி கற்கவும் உதவும்.

இப்பயிற்சிக்கு விண்ணப்பிக்க விரும்புவோர் [https://forms.gle/TLkxhiZEiDqf9Xta9] என்ற இணைப்பில் ஆன்லைன் மூலம் விண்ணப்பிக்கலாம். விண்ணப்பிக்க கடைசி தேதி 20/06/2025. 

மேலும் விவரங்களுக்கு, பேராசிரியர் அ. செல்வம் (திட்ட ஒருங்கிணைப்பாளர்), டாக்டர் ஜி. வேலுமணி (ஒருங்கிணைப்பாளர் DACE, CUTN) மற்றும் டாக்டர் பி. பூபதி (ஒருங்கிணைப்பாளர் Seed, CUTN) ஆகியோரைத் தொடர்பு கொள்ளலாம். மின்னஞ்சல் முகவரி: seed@acad.cutn.ac.in. இந்த அறிய வாய்ப்பை தவறவிடாமல், உங்கள் எதிர்காலத்தை ஒளிமயமாக்குங்கள்!