இனி Govt Job கட்டாயம் கிடைக்கும்.! தமிழக அரசு வழங்கும் 6 மாத இலவச பயிற்சி! எங்கே, எப்போது தெரியுமா?

அரசு வேலை என்பது லட்சக்கணக்கான மாணவர்களின் கனவு. அந்த கனவை நனவாக்கும் வகையில், தமிழக அரசு சார்பில் செயல்படும் அரசு போட்டித் தேர்வு பயிற்சி மையங்கள், மாணவர்களுக்கு இலவசமாக தரமான பயிற்சியை வழங்கி வருகின்றன. குறிப்பாக சென்னையில் செயல்பட்டு வரும் இந்த பயிற்சி மையங்களில் புதிய சேர்க்கைக்கான அறிவிப்பு வெளியாகியுள்ளது. இதன் மூலம் பொருளாதார சிரமம் காரணமாக தனியார் பயிற்சி மையங்களுக்கு செல்ல முடியாத மாணவர்களுக்கு ஒரு பெரிய வாய்ப்பு கிடைத்துள்ளது.

தமிழக அரசின் பயிற்சித் துறை கட்டுப்பாட்டின் கீழ், சென்னையில் இரண்டு முக்கிய இடங்களில் அரசு போட்டித் தேர்வு பயிற்சி மையங்கள் செயல்பட்டு வருகின்றன. பழைய வண்ணாரப்பேட்டையில் உள்ள சர் தியாகராயா கல்லூரியிலும், சேப்பாக்கத்தில் உள்ள மாநிலக் கல்லூரியிலும் இந்த மையங்கள் இயங்கி வருகின்றன. சர் தியாகராயா கல்லூரி மையத்தில் 500 மாணவர்களுக்கும், மாநிலக் கல்லூரி மையத்தில் 300 மாணவர்களுக்கும் இலவச பயிற்சி அளிக்க ஏற்பாடு செய்யப்பட்டுள்ளது. இங்கு டிஎன்பிஎஸ்சி, எஸ்எஸ்சி, ஐபிபிஎஸ், ஆர்ஆர்பி உள்ளிட்ட முக்கிய அரசு போட்டித் தேர்வுகளுக்கான முழுமையான பயிற்சி வழங்கப்படுகிறது.

இந்த பயிற்சி வகுப்புகள் 6 மாத காலத்திற்கு நடத்தப்படுகின்றன. வாராந்திர வேலை நாட்களில் மட்டும், தினமும் மதியம் 2 மணி முதல் மாலை 5 மணி வரை வகுப்புகள் நடைபெறும். பாடத்திட்டம், தேர்வு நுணுக்கங்கள், மாதிரி தேர்வுகள் மற்றும் சந்தேக விளக்கம் போன்றவை இந்த பயிற்சியின் முக்கிய அம்சங்களாக உள்ளன. இதற்கு விண்ணப்பிக்க குறைந்தபட்சம் 10-ம் வகுப்பு தேர்ச்சி பெற்றிருக்க வேண்டும். மேலும், விண்ணப்பதாரர்கள் 18 வயது பூர்த்தி அடைந்தவர்களாக இருக்க வேண்டும்.

பயிற்சியில் சேர விரும்பும் மாணவர்கள் www.cecc.in என்ற அதிகாரப்பூர்வ இணையதளத்தின் மூலம் டிசம்பர் 22 முதல் ஜனவரி 5 வரை ஆன்லைனில் விண்ணப்பிக்கலாம். விண்ணப்பித்த மாணவர்களில், 10-ம் வகுப்பு மதிப்பெண் மற்றும் இடஒதுக்கீடு விதிமுறைகள் அடிப்படையில் தகுதியானவர்கள் தேர்வு செய்யப்படுவர். தேர்வு செய்யப்பட்ட மாணவர்களின் விவரங்கள் பின்னர் இணையதளத்தில் வெளியிடப்படும். இந்த பயிற்சி மையங்களில் உணவு மற்றும் தங்கும் வசதி வழங்கப்படாது என்பதால், அதற்கான ஏற்பாடுகளை மாணவர்களே செய்துகொள்ள வேண்டும்.

அரசு வேலைக்கு தயாராகும் மாணவர்களுக்கு, செலவு இல்லாமல் தரமான பயிற்சி பெற இது ஒரு சிறந்த வாய்ப்பு. விவரங்களுக்கு 044-25954905 மற்றும் 044-28510537 ஆகிய தொலைபேசி எண்களைத் தொடர்பு கொள்ளலாம்.

குறிப்பாக பொருளாதார சிரமம் உள்ள மாணவர்கள் இந்த அரசு பயிற்சி மையங்களை முழுமையாக பயன்படுத்திக்கொள்ளலாம். குறிப்பிட்ட காலக்கெடுக்குள் விண்ணப்பித்து, அரசு வேலை கனவை நனவாக்கும் பாதையில் ஒரு முக்கிய படி எடுக்க இது சரியான நேரம்.