CBSE Class 12 :படிக்காம போயிடாதீங்க! பிளஸ் 2 இயற்பியலில் கண்டிப்பாக வரும் கேள்விகள் இவைதான்!

சிபிஎஸ்இ (CBSE) 12-ம் வகுப்பு பொதுத்தேர்வுகள் தொடங்கிவிட்டன. உடற்கல்வி (Physical Education) தேர்வைத் தொடர்ந்து, மாணவர்கள் இப்போது இயற்பியல் (Physics) தேர்வுக்குத் தயாராகி வருகின்றனர். பல மாணவர்களுக்கு இயற்பியல் என்றாலே ஒருவித பயம் இருக்கும். ஆனால், சரியான திட்டமிடல் மற்றும் முக்கியமான பகுதிகளைப் படித்தாலே போதும், சுலபமாக அதிக மதிப்பெண்களைப் பெறலாம். கடைசி நேரத்தில் எப்படித் தயாராவது என்பது குறித்த சில ஆலோசனைகளை இங்கே காண்போம்.

தேர்வில் அதிக மதிப்பெண்களை அள்ள, கீழே உள்ள பாடங்களில் கூடுதல் கவனம் செலுத்துங்கள்:

• மின்காந்த அலைகள் மற்றும் ஒளியியல் (Electromagnetic Waves & Optics): இந்தப் பகுதியிலிருந்து சுமார் 18 மதிப்பெண்களுக்குக் கேள்விகள் வர வாய்ப்புள்ளது. லென்ஸ் மேக்கர்ஸ் ஃபார்முலா (Lens Maker's Formula), ஹைஜென்ஸ் தத்துவம் (Huygen's principle) மற்றும் யங் இரட்டை பிளவு ஆய்வு (Young's Double Slit Experiment) ஆகியவற்றைத் தவறாமல் படியுங்கள்.

• நிலைமின்னியல் மற்றும் மின்னோட்டவியல் (Electrostatics & Current Electricity): சுமார் 16 மதிப்பெண்கள். காஸ் விதி (Gauss's Law) மற்றும் கிரிக்காஃப் விதிகள் (Kirchhoff's Rules) மிக முக்கியம்.

• காந்தவியல் மற்றும் மாறுதிசை மின்னோட்டம் (Magnetic Effects & AC): சுமார் 17 மதிப்பெண்கள். மூவிங் காயில் கால்வனோமீட்டர் (Moving Coil Galvanometer) மற்றும் LCR சுற்றுகளைப் பாருங்கள்.

• நவீன இயற்பியல் (Modern Physics): சுமார் 12 மதிப்பெண்கள். இது படிப்பதற்கு எளிமையான பகுதி.

கணக்கீடுகளை (Numericals) எளிதாகச் செய்ய, இந்தச் சமன்பாடுகளை உங்கள் விரல் நுனியில் வைத்துக்கொள்ளுங்கள்:

• காஸ் விதி (Gauss's Law)

• டிரிஃப்ட் வெலாசிட்டி (Drift Velocity)

• வீட்ஸ்டோன் பிரிட்ஜ் (Wheatstone Bridge)

• ஐன்ஸ்டீன் ஒளிமின் சமன்பாடு (Einstein's Photoelectric Equation)

• LCR சர்க்யூட் (LCR circuit)

தேர்வுக்கு முந்தைய நாள் பதற்றப்படாமல், முக்கியமான டெரிவேஷன்களை (Derivations) எழுதிப் பாருங்கள். குறிப்பாக எலக்ட்ரிக் ஃபீல்டு (Electric field due to a dipole), பயோட்-சாவர்ட் விதி (Biot-Savart Law) மற்றும் மிரர் ஃபார்முலா (Mirror Formula) போன்றவற்றை எழுதிப் பார்ப்பது நல்லது. மதியத்திற்குப் பிறகு, NCERT புத்தகத்தில் உள்ள "Points to Ponder" மற்றும் "Summary" பகுதிகளைப் புரட்டிப் பாருங்கள். இது ஒரு மதிப்பெண் கேள்விகளுக்கு மிகவும் உதவும்.

• ஒருவேளை விடை முழுமையாகத் தெரியவில்லை என்றாலும், கொடுக்கப்பட்ட மதிப்புகள் மற்றும் தொடர்புடைய ஃபார்முலாவை எழுதுங்கள். இதற்குக் கூட மதிப்பெண்கள் உண்டு.

• அலகுகளை (Units) சரியாகப் பயன்படுத்துங்கள். செமீ-யை மீட்டராக மாற்ற மறக்காதீர்கள்.

• தியரி கேள்விகளுக்குச் சம்மந்தப்பட்ட வரைபடங்களை (Diagrams) வரைவது கூடுதல் மதிப்பெண்களைப் பெற்றுத்தரும்.

• வரையறைகள் (Definitions) மற்றும் விதிகளைச் சொந்த நடையில் எழுதாமல், புத்தகத்தில் உள்ளவாறு துல்லியமாக எழுதுவது நல்லது.