சிகரெட் விலை உச்சம்.. ஒரு சிகரெட்டுக்கு ரூ.8.50 உயர்வு.. அடேங்கப்பா! ஒரு பாக்கெட் இவ்வளவா?

மத்திய அரசு சிகரெட் உள்ளிட்ட புகையிலை பொருட்கள் மீது இதுவரை இருந்த ஜிஎஸ்டி இழப்பீடு வரிக்கு பதிலாக புதிய கூடுதல் கலால் வரி மற்றும் சுகாதார வரியை கொண்டு வந்துள்ளது. புகையிலை பொருட்கள் மீதான இந்த புதிய வரி இன்று (பிப்ரவரி 1) முதல் அமலுக்கு வந்துள்ளது. இதன் காரணமாக சிகரெட் விலை ஒரு பாக்கெட்டுக்கு ரூ.22 முதல் ரூ.25 வரை உயர்ந்துள்ளது.

அதாவது 10 சிகரெட்டுகள் கொண்ட ஒரு பாக்கெட்டின் விலை குறைந்தபட்சம் ரூ.22 முதல் ரூ.25 வரை அதிகரித்துள்ளது. 76 மி.மீ நீளமுள்ள பிரீமியம் சிகரெட்டுகளின் விலை அதன் பிராண்டைப் பொறுத்து, 10 சிகரெட்டுகள் கொண்ட ஒரு பாக்கெட்டுக்கு ரூ.50 முதல் ரூ.55 வரை அதிகமாக இருக்கும். 

பிரபலமான நடுத்தர அளவிலான சிகரெட்டான வில்ஸ் நேவி கட் (76 மி.மீ நீளம்) ஒரு பாக்கெட் (10 சிகரெட்டுகள்) ரூ.95-க்கு விற்கப்பட்ட நிலையில், அதன் விலை ஒரு பாக்கெட்டுக்கு சுமார் ரூ.120 ஆக அதிகரிக்கிறது.

கோல்ட் ஃப்ளேக் லைட்ஸ், வில்ஸ் கிளாசிக் விலை எவ்வளவு?

கோல்ட் ஃப்ளேக் லைட்ஸ், வில்ஸ் கிளாசிக் மற்றும் வில்ஸ் கிளாசிக் மைல்ட்ஸ் போன்ற 84 மி.மீ நீளமுள்ள சிகரெட்டுகள் ஒரு பாக்கெட் (10 சிகரெட்டுகள்) ரூ.170-க்கு விற்கப்பட்ட நிலையில் இவற்றின் விலை ரூ.220 முதல் ரூ.225 வரை அதிகரிக்கிறது. 

கிளாசிக் கனெக்ட் (97 மி.மீ நீளம்) போன்ற மெல்லிய சிகரெட்டுகள் 20 சிகரெட்டுகள் கொண்ட ஒரு பாக்கெட் ரூ.300-க்கு விற்கப்பட்ட நிலையில், அதன் அதிகபட்ச விலை இனிமேல் ரூ.350 ஆக இருக்கும்.

ஒரு சிகரெட் என்று எடுத்துக் கொண்டால் 65 மி.மீ வரை உயரம் கொண்ட சிகரெட் (பில்டர் இல்லாதது) விலை ரூ.2.5 உயரும். 65 மி.மீ வரையலான சிக்ரெட் (பில்டர் உள்ளது) ரூ.2.10 உயரும். 65 மி.மீ - 70 மி.மீ வரையிலான சிகரெட் ரூ.3.60 முதல் ரூ.4 வரை உயரும். 70 மி.மீ முதல் 75 மி.மீ வரையிலான சிகரெட் ரூ.5.40 உயரும். மற்ற சிகரெட்டுகள், பிரீமியம் சிகரெட்டுகள் ரூ.8.50 வரை உயரும்.

சிகரெட் பிடிப்பது என்பது அதனை பயன்படுத்துபவர்களுக்கு மட்டுமின்றி அவர்களை சுற்றி இருப்பவர்களுக்கும் பெரும் கேடு விளைவிப்பதாகும். ஆகவே சிகரெட் விலை உயர்வை பெரும்பாலானவர்கள் வரவேற்றுள்ளனர். அதே வேளையில் இந்த விலை உயர்வு கடத்தல் மற்றும் போலியான தயாரிப்புகளை ஊக்குவிக்கக்கூடும் என்று விநியோகஸ்தர்கள் எச்சரிக்கின்றனர்.